धनगढी— ऐश्वर्य बहुमुखी क्याम्पस, धनगढी, नेपाल र आध्यात्मिक विश्वविद्यालय, दिल्ली, भारतबीच आपसी सहकार्यका लागि समझदारी पत्र (MoU) मा हस्ताक्षर सम्पन्न भएको छ। पूर्वीय दर्शनका मूल्य र मान्यतामा आधारित भई विद्यार्थीहरूको समग्र विकासका लागि आध्यात्मिकता तथा नैतिक शिक्षामा जोड दिँदै आइरहेको आध्यात्मिक विश्वविद्यालयसँग सहकार्य गर्ने उद्देश्यले उक्त समझदारी पत्रमा हस्ताक्षर गरिएको हो।
समझदारी पत्रमा आध्यात्मिक विश्वविद्यालयका प्रतिनिधि पि. बि. के. सुमन भारती र ऐश्वर्य बहुमुखी क्याम्पसका क्याम्पस प्रमुख नरेश पन्तले हस्ताक्षर गरी एक–अर्कालाई हस्तान्तरण गर्नुभएको थियो। यस सहकार्यबाट शैक्षिक आदान–प्रदान, संयुक्त कार्यक्रम सञ्चालन तथा विद्यार्थीहरूको व्यक्तित्व विकासमा टेवा पुग्ने विश्वास लिइएको छ।
उक्त अवसरमा आध्यात्मिक विश्वविद्यालयका प्रमुख वक्ता पि. बि. के. अमोल कुमारजीले ‘आधुनिकता र जीवन दर्शन’ विषयमा विशेष प्रस्तुतीकरण गर्नुभएको थियो। उहाँले आधुनिक जीवनशैली र आध्यात्मिक मूल्यबीच सन्तुलन आवश्यक रहेकोमा जोड दिनुभयो।
क्याम्पस प्रमुख नरेश पन्तको सभापतित्वमा सम्पन्न कार्यक्रममा ऐश्वर्य बहुमुखी क्याम्पसमा अध्ययनरत ५०० भन्दा बढी विद्यार्थी तथा प्राध्यापकहरूको उल्लेखनीय सहभागिता रहेको थियो। सहभागीहरूले कार्यक्रमलाई ज्ञानवर्धक र प्रेरणादायी भएको प्रतिक्रिया दिएका थिए।
