धनगढी – आफ्नो जन्मदिनको अवसरमा डडेल्धुराका चेतराज भट्टले धनगढीको दृष्टि फाउण्डेसनलाई न्यानो लुगा तथा फलफूल वितरण गरेका छन् ।
भट्टले शुक्रवार फाउण्डेसनमै पुगेर २० थान बढी न्यानो लुगा र फलफूल वितरण गरेका हुन् । बेसहाराको सहारा बनेको दृष्टि फाउण्डेसनलाई विभिन्न समयमा सहयोग गर्दै आएका भट्टले जन्मदिनमा सहयोग गर्न पाउँदा खुसी लागेको बताए ।
आगामी दिनहरूमा पनि आफुले फाउन्डेसनमा सक्दो सहयोग गर्ने बताएका भट्टले अनावश्यक खर्च गर्ने परिपाटीलाई निरुत्साहित गर्न आफूले असहायसँग जन्मउत्सब मनाउने गरेको बताए ।
फाउण्डेसनकी अध्यक्ष कल्पना भट्टले समय समयमा फाउण्डेसनलाई सहयोग हुँदै आएको र आगामी दिनहरूमा पनि यस्तै सहयोगको भावना बढ्दै जाओस् भन्दै भट्टलाई जन्मोत्सवको शुभकामना दिदै सामाजिक कार्य तथा राजनीतिक जीवनको उत्तरोत्तर प्रगतिको कामना गरिन् । उनले जाडो मौसम सुरु हुन लागेकोले फाउन्डेसनमा आश्रय लिएर बसेकाहरुलाई न्यानो लुगाले सहयोग पुग्ने बताइन् ।
धनगढी उपमहानगरपालिका–१३ मा रहेको दृष्टि फाउन्डेसनले मानसिक सन्तुलन गुमाएका महिला, यौन हिंसामा परेका, सहाराविहीन भएका र अन्य हिंसामा परेका महिलालाई सेवा दिइरहेको छ । फाउन्डेसनललाई समाजसेवी तथा व्यवसायी भट्टले यस अघि पनि ५० थान बढी न्यानो लुगा सहयोग गरेका थिए ।
भट्ट नेपाली काँग्रेसका युवा नेतासमेत हुन् । उनी डडेल्धुराको गन्यापधुरा गाउँपालिका वडा नम्बर ४ को पूर्व वडाध्यक्षसमेत हुन् ।
