कञ्चनपुर – कञ्चनपुरमा वातावरण स्वच्छता साथै कार्य सहजताका लागि ५० साईकल वितरण गरिएको छ ।
नेपाल राष्ट्रिय समाज कल्याण संघ (एनएनएसडब्ल्यूए)ले कार्बन उत्सर्जन कम गरि स्वच्छ वातावरण निर्माण गर्ने लगायत बहु–प्रयोजनका लागि साइकल वितरण गरेको हाे ।
एनएनएसडब्ल्यूए र डीसीए नेपालको साझेदारीमा सञ्चालित सुदृढ परियोजनाले ‘गिफ्ट प्रोजेक्ट–२०२४’ अन्तर्गत कञ्चनपुरकाे दोधारा चाँदनी नगरपालिकामा २५ र भीमदत्त नगरपालिकामा २५ गरि ५० जनालाई साईकल वितरण गरेको हो । साथै डडेल्धुराकाे परशुराम नगरपालिकामा ५ जनालाई साईकल वितरण गर्ने तयारी गरिएको छ।
एनएनएसडब्ल्यूएद्वारा सञ्चालित सुदृढ परियोजनाका कार्यक्रम संयोजक राजकुमार सुनारले परियोजनाले काम गरिरहेको पालिकामा रहेका विपद् व्यवस्थापन समिति, कृषक समूहहरू, सहकारी सदस्यहरू र युवाहरूलाई साईकल वितरण गरिएको बताएका छन् ।
तरकारी खेतीमा आवद्ध कृषकहरूले टोकरीमा तरकारी बेच्न जानुपर्ने बाध्यताको अन्त्य गर्न, कार्बन उत्सर्जन गर्ने मोटरसाईकलको प्रयोग कम गर्न, खर्च न्यूनिकरण गर्न, कार्यबोझ कम गर्न, समयको बचत गर्न र स्थानीय पालिका तथा वडा कार्यालहरूमा पहुँच वृद्धि गर्ने उद्देश्यका साथ साईकल वितरण गरिएको उनले बताए ।
नेपाल राष्ट्रिय समाज कल्याण संघ (एनएनएसडब्ल्यूए)का कार्यकारी निर्देशक अशोक बिक्रम जैरूले संस्थाले वायु प्रदुषणलाई रोक्ने उद्देश्यका साथ कार्यक्रमहरू सञ्चालन गरिरहेको बताए ।
सोही उद्देश्य अन्तर्गत आज साईकल वितरण गरिएको उनले बताए । यसले एकातिर विपद् व्यवस्थापन समिति, कृषक समूहहरू, सहकारी सदस्यहरू र युवाहरूलाई आर्थिक तथा समयको बचत गर्न टेवा पुऱ्याउने छ भने, अर्कोतिर वातावरण अनुकूलनमा पनि धेरै हदसम्म मद्दत गर्ने उनको भनाई छ।
साईकल प्राप्त गरेपछि कृषकहरूले आफुले उत्पादन गरेका तरकारीहरूको बजारीकरणमा सहजता हुने बताएका छन् । उनिहरूले कृषक समूह तथा सहकारीको बैठकमा जानसमेत समयको बचत हुने साथै यसबाट वातावरण पनि स्वच्छ हुने उनीहरूको भनाई छ।
सुदृढ परियोजनाले कार्बन उत्सर्जन कम गर्दै जलवायु अनुकुलनका क्रियाकलापहरू गर्दै आएको छ। परियोजनाले प्रत्येक वर्ष गिफ्ट प्रोजेक्ट अन्तर्गत साइकल वितरण, माछा वितरण साथै वृक्षारोपण जस्ता क्रियाकलापहरू गर्दै आएको छ।
