काठमाडौं। नेपालमा बीवाइडी (BYD) विद्युतीय सवारीसाधन आयात तथा भन्सार जाँचपास प्रक्रियालाई लिएर सार्वजनिक रूपमा उठेका प्रश्न र सञ्चारमाध्यममा प्रकाशित समाचारप्रति आधिकारिक वितरक साइमेक्स इन्कले तथ्यगत स्पष्टिकरण जारी गरेको छ।
कम्पनीले आर्थिक वर्ष २०८३/८४ को बजेट सार्वजनिक हुनुअघि नेपाल भित्रिएका तथा भन्सार जाँचपास भएका विद्युतीय सवारीसाधनहरू पूर्ण रूपमा प्रचलित कानुन, भन्सार नियमावली तथा निर्धारित प्रक्रियाअनुसार आयात गरिएको जनाएको छ।
साइमेक्सका अनुसार कोरला भन्सार नाका हुँदै ६४९ वटा तथा रसुवागढी भन्सार नाका हुँदै ४७२ वटा बीवाइडी सवारीसाधन नेपाल भित्रिएका छन्। यसबाहेक २२६ वटा सवारीसाधन चिनियाँ भन्सार क्षेत्रमा आइपुगे पनि हालसम्म भन्सार जाँचपास प्रक्रिया पूरा भएको छैन।
कम्पनीले कुनै पनि चरणमा विशेष सुविधा, प्राथमिकता प्राप्त प्रक्रिया वा अनधिकृत भन्सार व्यवस्थाबाट लाभ नलिएको तथा त्यस्तो सुविधा माग नगरेको दाबी गरेको छ। कम्पनीका अनुसार ग्राहकबाट पहिल्यै बुकिङ भइसकेकाले ती बुकिङ पूरा गर्न र विद्युतीय सवारीसाधनको बढ्दो माग सम्बोधन गर्न आयात गरिएको हो।
साइमेक्सले कर परिवर्तनबाट बच्न सरकारी निकायसँग मिलेमतो गरेको वा अनुचित लाभ लिएको भन्ने आरोपलाई निराधार, असत्य तथा कम्पनीको प्रतिष्ठामा आघात पुर्याउने खालको भएको जनाएको छ। कम्पनीका सम्पूर्ण आयात गतिविधि नियमित व्यावसायिक आवश्यकता, मौज्दात व्यवस्थापन, ढुवानी तालिका र प्रचलित कानुनका आधारमा सञ्चालन हुने दाबी गरिएको छ।
कम्पनीले आवश्यक परे आयात रेकर्ड, भन्सार घोषणा विवरण, ढुवानी अभिलेख, सीमा प्रवेशसम्बन्धी कागजात, भुक्तानी विवरण तथा जाँचपास स्वीकृतिसम्बन्धी सबै दस्तावेज सम्बन्धित निकायलाई उपलब्ध गराउन तयार रहेको जनाएको छ।
साथै, सञ्चारमाध्यम र सरोकारवालालाई आधिकारिक अभिलेख तथा सम्बन्धित निकायबाट तथ्य पुष्टि नगरी निष्कर्षमा नपुग्न र व्यवसायको प्रतिष्ठामा असर पुग्ने सामग्री प्रकाशन नगर्न आग्रह गरेको छ। कम्पनीले विद्युतीय सवारीसाधन क्षेत्रले नेपालको वातावरणीय लक्ष्य, इन्धन आयात न्यूनीकरण तथा दिगो यातायात विस्तारमा महत्वपूर्ण योगदान पुर्याइरहेको उल्लेख गर्दै तथ्यमा आधारित समाचार सम्प्रेषण र जिम्मेवार सार्वजनिक बहसको आवश्यकता औंल्याएको छ।
साइमेक्सले सम्बन्धित निकायबाट भइरहेको अध्ययन तथा समीक्षा प्रक्रियाले वास्तविकता स्पष्ट पार्ने र सार्वजनिक रूपमा फैलिएका भ्रम तथा गलत सूचनाको अन्त्य हुने विश्वास व्यक्त गरेको छ।
