धनगढी : बैतडीमा नेपाल कम्युनिष्ट पार्टी (एमाले) र राष्ट्रिय स्वतन्त्र पार्टी (रास्वपा) का कार्यकर्ताबीच झडप भएको छ।
जिल्लाको डिलासैनी गाउँपालिका–७ मल्लालेक टोलमा हिजो साँझ करिब ७ः५० बजे तिर चुनावी घरदैलो कार्यक्रमका क्रममा दुई पक्षबीच विवाद चर्किँदा झडप भएको जिल्ला प्रहरी कार्यालयले जनाएको छ।
प्रहरी निरीक्षक सुरज सिंहका अनुसार झडपमा डिलासैनी–७ का लालसिंह धामी, २८ वर्षीय जनक धामी र २६ वर्षीय माधव धामी घाइते भएका छन्। लालसिंह धामी रास्वपा कार्यकर्ता हुन् भने जनक र माधव दुवै जना एमाले कार्यकर्ता रहेको प्रहरीले जनाएको छ। उनीहरूको गोकुलेश्वर अस्पतालमा उपचार भइरहेको छ।
घटनामा संलग्न रहेको आरोपमा पाँच जनालाई प्रहरीले पक्राउ गरेको छ।
बैतडीमा एमालेबाट दामोदर भण्डारी र रास्वपाबाट हरिमोहन भण्डारी उम्मेदवार रहेका छन्। दामोदर र हरिमोहन गाउँले दाजुभाइ हुन्। प्रहरीले घटनाबारे थप अनुसन्धान भइरहेको जनाएको छ।
