धनगढीः धानको न्यूनतम समर्थन मूल्य कार्यान्वयन गर्नको लागि कैलालीका प्रमुख जिल्ला अधिकारी कृष्णप्रसाद लम्सालको अध्यक्षतामा बैठक बसेको छ। शुक्रवार विभिन्न राजनीतिक दल, किसान, धान खरिद गर्ने व्यापारी सम्मिलित बैठकले कैलालीमा खाद्य व्यवस्था तथा व्यापार कम्पनी लिमिटेड धनगढीलाई यथाशीघ्र धान खरिद प्रक्रिया अगाडि बढाउन आग्रह गर्ने निर्णय गरेको हो।
यो पटक कैलाली जिल्लाबाट धान खरिदको परिमाण साबिक भन्दा वृद्धि गरी कम्तीमा ३ लाख क्विन्टलसम्म पुऱ्याउन अनुरोध गर्ने निर्णय गरिएको छ। निर्णयमा खाद्यलाई कार्तिक ११ गतेभित्र धान खरिद प्रक्रिया प्रारम्भ गर्ने व्यवस्था मिलाउन भनिएको छ।
यसैगरी कैलालीका सबै स्थानीय तहको समन्वयमा आवश्यकता अनुसार धान खरिद केन्द्रहरू थप गर्न पहल गर्न खाद्य व्यवस्था तथा व्यापार कम्पनी लिमिटेड धनगढीलाई सुझाव दिने निर्णय पनि गरिएको छ।
बैठकले नेपाल सरकारद्वारा निर्धारण गरिएको न्यूनतम समर्थन मूल्यमै धानको खरिदबिक्री गर्न गराउन निजीक्षेत्र लगायत सरोकारवालाहरू सबैलाई अनुरोध गर्ने निर्णय गरेको छ।
बैठकले न्यूनतम समर्थन मूल्य निर्धारण गर्ने क्रममा किसान र उपभोक्ताको हित दुबै सुनिश्चित हुने गरी व्यवहारिक समर्थन मूल्य तोक्न नेपाल सरकारलाई सुझाव दिने, अन्य राष्ट्रको नीति तथा त्यहाँको धानको मूल्य समेतको विश्लेषण गरी त्यसका आधारमा व्यवहारिक नीति निर्माण गर्न नेपाल सरकारलाई सुझाव दिने, कैलाली जिल्लाका किसानहरूले परम्परागत रूपमा लगाउने मोटो धानको विकल्प खोजी गरी क्रमशः बजार मागअनुसार मसिनो तथा गुणस्तरीय धान उत्पादन गर्न प्रोत्साहित गर्ने उद्देश्यले सचेतनामूलक कार्यक्रमहरू सञ्चालन गर्न प्रदेश सरकार, स्थानीय सरकार तथा सम्बन्धित निकायहरूलाई अनुरोध गर्ने निर्णय गरेको छ।
बैठकले धानको समर्थन मूल्य अनुसार खरिद बिक्री भएको वा नभएको विषयमा अनुगमन समिति गठन गरी अनुगमन गर्ने र सो समितिमा संघरप्रदेशरस्थानीय सरकारका प्रतिनिधि, किसानको प्रतिनिधि र व्यवसायीको एक संयुक्त समिति बनाउने निर्णय गरेको छ।
सबै धान खरिद केन्द्रहरूमा खरिद बिक्री मूल्य सर्वसाधारणले स्पष्ट देख्न सक्ने गरी अनिवार्य रूपमा टाँस गर्न पनि बैठकले आग्रह गरेको छ। साथै निर्धारित मूल्य कार्यान्वयनका लागि भाइटिकाको दिन देखि जिल्ला प्रशासन कार्यालय कैलालीको गेटमा अनसन बसेका अनसनकारी नेत्र भण्डारीले अनसन अन्त्य गर्ने निर्णय गरिएको छ।
उक्त निर्णयहरूको कार्यान्वयन अवस्थाको समीक्षा गर्न अर्को बैठक १५ दिनभित्र बस्ने जनाइएको छ। कैलालीमा हाल सरकारले तोकेको समर्थन मूल्यभन्दा किसान कम मूल्यमा धान बिक्री गर्न बाध्य भएका छन्। सरकारले साउन २६ गते मोटा धानको ३ हजार ४६३ रुपैयाँ ८१ पैसा र मध्यम धानको ३ हजार ६२८ रुपैयाँ ३३ पैसा निर्धारण गरेको थियो। तर किसानले हाल सो मूल्य भन्दा एक हजार देखि एक हजार पाँच सय रुपैयाँ कममा धान बिक्री गर्नुपर्ने बाध्यता छ।
