काठमाण्डौं –पर्सामा हैजा सङ्क्रमितको सङ्ख्या १ सय ७५ जना पुगेको छ ।
भदौ ६ गते शुक्रवार पहिलो पटक ३ जनामा हैजा पुष्टि भएकोमा त्यसपछि आज बिहानसम्म १ सय ७५ जनामा पुष्टि भएको जिल्ला स्वास्थ्य कार्यालय पर्साले जनाएको छ ।
हैजा पुष्टि भएकामध्ये १ सय ५९ जना वीरगञ्ज महानगरपालिकाका र १६ जना पोखरिया नगरपालिकाका हुन् । यस्तै वीरगञ्ज महानगरपालिकामा अहिलेसम्म झाडापखालाका ८ सय ४ जना बिरामी अस्पताल भर्ना भएका छन् । यसमध्ये ३० जना हिजो बिहान १० बजेपछि थपिएका हुन् ।
८ सय ४ जना झाडापखाला तथा हैजाका बिरामीमध्ये ४७ जना हैजा सङ्क्रमितसहित १ सय ९५ जनाले अझै उपचार गराइरहेका छन् । पोखरियामा हिजो बिहानपछि २ जनासहित अहिलेसम्म झाडापखालाका ३० जना बिरामी अस्पताल भर्ना भएका छन् । उनीहरूमध्ये १६ जनामा हैजा पुष्टि भएको हो ।
सरकारले पर्सामा फैलिएको झाडापखाला र हैजा नियन्त्रण उन्मुख रहेको बताए पनि बिरामी थपिने क्रम हेर्दा अझै अवस्था जटिल देखिन्छ । हैजा समुदायस्तरमै फैलिएको छ । वीरगञ्ज महानगरपालिकाले एक हप्तादेखि सबै शिक्षण संस्था बन्द गरेको छ । खानेपानीको शुद्धता र सरसफाइका लागि तीव्र काम भएका छन् । तर नयाँ बिरामी भेटिने क्रम रोकिएको छैन ।
यस्तै यसअघि शङ्का गरेको खानेपानीमा हैजाको जीवाणु भेटिएन । १० दिन हुँदा पनि हैजाको स्रोत पत्ता लाग्न सकेको छैन । सरकारले नियन्त्रण हुन लाग्यो भन्ने, नयाँ बिरामी भेटिरहने र स्रोत पहिचान नहुने कुराले वीरगञ्जसहित पर्सामा हैजाको चिन्ता बढिरहेको छ ।
