धनगढी, सूचना र सञ्चार मानव जीवनको मूल आधार हो। परिवार, समाज र राष्ट्रको अस्तित्व र प्रगतिका लागि सञ्चार अपरिहार्य रहँदै आएको छ। प्रारम्भिक मौखिक सञ्चारदेखि छापा, रेडियो र टेलिभिजन हुँदै अहिले डिजिटल मिडियासम्मको यात्रामा माध्यम मात्र परिवर्तन भए, तर सन्देशको महत्त्व निरन्तर उस्तै रह्यो।
आजको युग डिजिटल सञ्चारको युग हो। यही प्रवाहभित्र प्रतिस्पर्धी मञ्चका बीच स्थापना भएको सुदर्शन टेलिभिजनले आफ्नो पहिलो वर्ष पूरा गरेको छ। छोटो समयको यात्रामा यस टेलिभिजनले समाचार, विचार र कार्यक्रममार्फत डिजिटल पत्रकारितामा विश्वासिलो उपस्थिति बनाएको छ, जुन हामी सबैका लागि गौरवको विषय हो।
पत्रकारिताको मूल धर्म ‘एबीसी’ अर्थात शुद्धता, सन्तुलन र स्पष्टतामा आधारित रही, विभिन्न चुनौतीहरूको सामना गर्दै एक वर्षे यात्रा पूरा गर्नु हाम्रो उपलब्धि हो। यस अवधिमा ‘प्रिमियम हेल्थ हव’ जस्ता स्वास्थ्य–केन्द्रित कार्यक्रम, ‘सुदर्शन संवाद’ जस्ता शिक्षादेखि समाजका विविध प्रश्नमाथि केन्द्रित कार्यक्रम, ‘शब्दादि’ जस्ता कला, संस्कृति र साहित्यसँग सम्बन्धित कार्यक्रम तथा तथ्यपरक समाचार प्रसारणमार्फत हामीले दर्शकसामु आफ्नो पहिचान स्थापित गरेका छौँ।
यद्यपि, चुनौतीहरू अझै कायम छन्। डिजिटल क्षेत्रमा प्रतिस्पर्धा तीव्र हुँदै गइरहेको छ। सामग्रीको गुणस्तर, तथ्यपरकता र शुद्धता सुनिश्चित गर्नु हाम्रो प्रमुख दायित्व हो। आगामी वर्षमा सुदर्शनले यिनै चुनौतीलाई अवसरमा रूपान्तरण गर्दै आफ्नो विश्वसनीयता र प्रभाव विस्तार गर्ने लक्ष्य राखेको छ।
यस अवसरमा सुदर्शन परिवार सम्पूर्ण दर्शक, विज्ञापनदाता, सहयोगी तथा शुभेच्छुकप्रति हार्दिक आभार व्यक्त गर्दछ। हामी निरन्तर जिम्मेवार, गुणस्तरीय र विश्वसनीय डिजिटल पत्रकारिताको अभ्यासमा प्रतिबद्ध रहिरहनेछौं। — सम्पादक
