धनगढी ।सुदूरपश्चिमका तीन राजनीतिक दलले मुख्यमन्त्री दीर्घबहादुर सोडारीको राजीनामा माग गरेका छन् ।
नयाँ गठबन्धनमा आबद्ध नेपाली कांग्रेस, नेकपा (एमाले) र नागरिक उन्मुक्ति पार्टीले आज बिहान धनगढीमा संयुक्त रूपमा पत्रकार सम्मेलन गरी मुख्यमन्त्री सोडारीको राजीनामा माग गरेका हुन ।
कांग्रेस संसदीय दलका नेता कमलबहादुर शाहले भने, ‘नयाँ गठबन्धन बनेपछि मुख्यमन्त्री सोडारी अल्पमतमा परिसक्नुभएको छ । ठुला दल उहाँको समर्थनमा छैनन् । बजेटमाथिको छलफल हुन सकेको छैन । अल्पमतको सरकारले ठुला निर्णयहरू गर्न मिल्दैन ।’
एमाले संसदीय दलका उपनेता सन्तोष थापा (शर्मा) ले हाम्रो पार्टीले सरकारलाई दिएको समर्थन फिर्ता लिइसकेकाले मुख्यमन्त्रीलाई नैतिक रूपमा सरकारमा बस्न नसुहाएको बताइन् । नयाँ गठबन्धनको सरकार बनाउन उनले मार्ग प्रशस्त गर्नु पर्ने उनको सुझाव छ ।
नागरिक उन्मुक्ति पार्टीका संसदीय दलका नेता घनश्याम चौधरीले सरकारले बिचौलियाबाट ल्याएको बजेट बिचौलियाबाटै सार्वजनिक गरेकाले बजेट पास नहुने बताए । सरकार अल्पमतमा परेको र मुख्यमन्त्रीले विश्वासको मत लिन खोजे नागरिक उन्मुक्तिले मत नदिने उनले बताए ।
केन्द्रमा नयाँ सत्ता गठबन्धन बनेपछि सुदूरपश्चिममा एमालेले मुख्यमन्त्री सोडारीलाई दिएको समर्थन फिर्ता लिइसकेको छ । एमालेले समर्थन फिर्ता लिएसँगै सोडारी नेतृत्वको सरकार अल्पमतमा छ ।
नयाँ गठबन्धन बनेपछि असार १ गते पेस भएको बजेटमाथिको छलफल हुन सकेको छैन । यसैबिच सभामुख भीमबहादुर भण्डारीले मुख्यमन्त्रीसहितको सर्वदलीय बैठक बोलाउनु भएको थियो । छलफल पनि अगाडि बढ्न सकेको छैन ।
