धनगढी – धनगढीमा भानुभक्त आचार्यको जन्मजयन्तीको अवसरमा पुस्तक परिचर्चा कार्यक्रम गरिएको छ ।
आज शनिबार सुदूरपश्चिमाञ्चल साहित्य समाजको आयोजनामा लेखक खेम बतास र गंगा विष्टको कृतिको परिचर्चा गरिएको हो ।
पुस्तक परिचर्चा कार्यक्रममा लेखक खेम बतासको कथासंग्रह बुढीपोल्ली र लेखिका गंगा विष्टको गजलसंग्रह सवालको परिचर्चा गरिएको छ ।
कार्यक्रममा प्राध्यापक तथा साहित्यकार गणेश जोशीले आदिकवि भानुभक्त आचार्यका बारेमा आफ्ना भनाइहरु राखेका थिए । सहजता, सरलता र सान्दर्भिकता भानुभक्त आचार्यको सबैभन्दा मुख्य विशेषता भएको उनले बताएका छन् ।
पृथ्वीनारायण शाहले नेपालको राजनीतिक एकीकरण गरे भने भानुभक्त आचार्यले नेपालको सांस्कृतिक एकीकरण गरेको थियो भनेर भनिने गरेको प्राध्यापक तथा साहित्यकार जोशीले बताएका छन् ।
डोटेली भाषा, संस्कृति, सामाजिक मूल्यमान्यता र परम्परा समेटिएको साहित्यकार खेम बतासको पहिलो कृति बुढीपोल्ली कथासंग्रह नेपाली साहित्य र विशेष गरि सुदूरपश्चिमको साहित्यका लागि एक उल्लेखनीय कृति रहेकोे साहित्यकार नरेन्द्र भट्टले बताएका छन् ।
१२ वटा कथा समेटिएको बुडीपोल्लीमा प्रत्येक कथाहरूले आफ्नै महत्त्व बोकेको प्राध्यापक तथा साहित्यकार तुलसी शर्माले बताइन् ।
पुस्तक परिचर्चाकै क्रममा साहित्यकार तथा प्राध्यापक शर्माले पुस्तकमा विशेष गरि जातीयता, लैङ्गकता र वर्गियता समेटिएको बताएकी छन् ।
यसैगरी गजलसंग्रह सवालको परिचर्चा गर्दै साहित्यकार सिर्जन श्रीले सवाज गजलसंग्रहले सवाल भित्रका सवालहरुको उत्तर खोजिरहेको बताएका छन् । सवाल गजलसंग्रह भित्र काफियाहरुको राम्रो प्रयोग गरिएको उनले बताएका छन् ।
त्यस्तै साहित्यकार नारा जोशीले विष्टको पहिलो कृति भएकाले गजलका केही सिद्धान्तहरुमा त्रुटि भएपनि आगामी दिनमा त्यसलाई सुधार गर्दै जाने विश्वास व्यक्त गरेकी छन् ।
पुनर्वास नगरपालिकाका नगर प्रमुख तोयप्रसाद शर्माको प्रमुख आतिथ्यता रहेकोे उक्त पुस्तक परिचर्चा कार्यक्रममा सुदूरपश्चिमाञ्चल साहित्य समाजका अध्यक्ष तिर्थराज पाण्डेयको अध्यक्षता रहेकोे थियो ।
सुदूरपश्चिमाञ्चल साहित्य समाजका महासचिव गणेश नेपालीले सञ्चालन गरेको उक्त कार्यक्रममा समाजकी उपाध्यक्ष रुपा स्वारले स्वागत मन्तव्य राखेकी थिइन् ।
पुस्तक परिचर्चा कार्यक्रममा विभिन्न साहित्यकारहरुको उपस्थिति रहेकोे थियो ।
