कैलाली ।चलचित्र ‘ह्रस्व–दीर्घ’ कात्तिक ३० गते प्रदर्शन हुने भएको छ ।
नेपाली, हिन्दी र अन्य भाषामा एकैदिन उक्त चलचित्र प्रदर्शनको तयारी गरिएको छ । सुदूरपश्चिम जन्मथलो रहेका निर्देशक चन्द्र पन्तको निर्देशन रहेको उक्त चलचित्रमा नेपाल र भारतका लोकप्रिय कलाकारहरूको अभिनय रहेको छ ।
सोमबार धनगढीमा पत्रकारहरूसँगको भेटघाटमा निर्देशक पन्तले फरक कथावस्तुका साथ ह्रस्व दीर्घ उत्कृष्ट चलचित्र बनेको दाबी गरेका छन्।
ज्योतिषसमेत रहेका नायक हरिहर अधिकारी र अभिनेत्री नीता ढुङ्गानाको अभिनय रहेको चलचित्रमा अभिनेत्री बिपना थापा पनि लामो समयपछि देखिँदै छन् । हरिहर र नितासँगै, चर्चित दक्षिण भारतीय कलाकार ब्रह्मानन्द, बलिउड कलाकार प्रदीप रावतसँगै गरिमा शर्मा, प्रशान्त ताम्राकार, सरोज खनाललगायतको अभिनय छ ।
विश्वकै ठूलो मानिएको भारतको रामोजी स्टुडियोदेखि मुम्बई, चितवन र काठमाडौँमा चलचित्रको छायाङ्कन गरिएको छ ।
अभिनेता हरिहरद्वारा लिखित कथामा आधारित यो फिल्ममा बलिउड छायाङ्कन कवीरलालको छायाङ्कन, मित्र डी गुरुङको सम्पादन, रामजी लामिछाने र बलिउड कोरियोग्राफर शुष्मा सुमनको कोरियोग्राफी छ ।
यो फिल्म नीता फिल्म्सको ब्यानरमा निर्माण भएको हो । चलचित्रका निर्देशक पन्तले थुर्पै नेपाली चलचित्र सहित दर्जनौँ भोजपुरी चलचित्रहरू निर्देशन गरिसकेका छन् ।
