काठमाण्डाैं – श्रीलङ्कासँगको टी–२० र एकदिवसीय अन्तर्राष्ट्रिय क्रिकेट शृङ्खलाका लागि वेस्ट इन्डिजको टोली घोषणा भएको छ ।
वेस्ट इन्डिजको टोलीमा निकोलस पूरन, आन्द्रे रसेल, अकेल होसन र शिमरन हेटमायर जस्ता सिनियर खेलाडी अटाएका छैनन् । व्यक्तिगत कारण उनीहरू टोलीमा नपरेका वेस्ट इन्डिज क्रिकेट बोर्डले जनाएको छ ।
वेस्ट इन्डिजको टी–२० टोलीमा इभिन लेविस, ब्रान्डन किङ फर्किएका छन् भने अलराउन्डर टेरेन्स हिन्ड्स र शामर स्प्रिङ्गरले पहिलो पटक मौका पाएका छन् । रोभम्यान पावेलले नेतृत्व गर्ने टोलीमा अल्जारी जोसेफ, रोस्टन चेस पनि छन् ।
यस्तै एकदिवसीय टोलीमा १७ वर्षीय विकेटकीपर ब्याटर जेवेल एन्ड्रियु, ब्रान्डन किङ, शेरफान रथरफोर्ड छन् । यो टोलीको नेतृत्व शाई होपले गर्नेछन् ।
वेस्ट इन्डिज र घरेलु टोली श्रीलङ्काबीचको टी–२० र एकदिवसीय शृङ्खला यही अक्टोबर १३ देखि अक्टोबर २६ सम्म हुँदैछ ।
