एजेन्सी :सुडानको दार्फुर क्षेत्रमा फैलिएको हैजा महामारीका कारण पछिल्लो एक सातामै कम्तीमा ४० जनाको ज्यान गएको छ।
डाक्टर बिना सीमा (एमएसएफ) का अनुसार, पछिल्ला केही वर्षयताकै यो सबैभन्दा गम्भीर हैजा प्रकोप हो। एमएसएफले जनाएको अनुसार, युद्धग्रस्त दार्फुर क्षेत्र महामारीबाट सबैभन्दा बढी प्रभावित भएको छ।
त्यहाँका स्वास्थ्यकर्मीहरूले सात दिनको अवधिमा मात्रै दुई हजार ३०० भन्दा बढी बिरामीको उपचार गरेका छन्।
गत वर्षदेखि साउन २७ सम्म, देशभर हैजाका ९९ हजारभन्दा बढी शङ्कास्पद बिरामी दर्ता भएका छन्, जसमध्ये दुई हजार ४७० जनाले ज्यान गुमाइसकेका छन्।
साफ पानीको अभावले महामारी थप भयावह
हैजा प्रदूषित खानेपानी मार्फत सर्ने रोग हो, जसमा अचानक पखाला र अत्यधिक कमजोरी देखिन्छ। समयमै उपचार नपाए केही घण्टामै ज्यान जाने खतरा रहन्छ। यद्यपि, यो रोग नुनपानी घोल र औषधिको सहायताले सजिलै नियन्त्रणमा ल्याउन सकिन्छ।
तर, सुडानमा जारी द्वन्द्वका कारण लाखौँ मानिस विस्थापित भएका छन्, जसले शुद्ध खानेपानी र स्वास्थ्य सेवा पहुँचबाट वञ्चित भएकाले रोग फैलन सजिलो भएको एमएसएफले जनाएको छ।
ताविलाको अवस्था अत्यन्त गम्भीर
उत्तरी दार्फुर राज्यको ताविला क्षेत्रमा करिब तीन लाख ८० हजार विस्थापित जनता अत्यन्तै कठिन अवस्थामा जीवन बिताइरहेका छन्। त्यहाँका प्रत्येक व्यक्तिका लागि दैनिक पानीको उपलब्धता केवल तीन लिटर रहेको छ, जुन आपत्कालीन मापदण्ड अनुसार आवश्यक ७।५ लिटरभन्दा आधा हो।
शिविरभित्र रहेका धेरैले फोहोर पानी पिउनु परेको छ, शौचालयको सुविधा छैन, बालबालिकाहरू खुला स्थानमा दिसा गर्न बाध्य छन्।
यस्तै दुःखद अवस्थाले हैजा अझ तीव्र रूपमा फैलिरहेको छ।
सुडान : विश्वमै सबैभन्दा धेरै हैजा मृ*त्यु हुने देश
विश्व स्वास्थ्य सङ्गठन अनुसार, पछिल्लो डेढ वर्षमा सुडान हैजाबाट सबैभन्दा धेरै मृत्यु भएको देश बनेको छ। त्यहाँको मृत्यु दर २.१ प्रतिशत रहेको छ, जुन विश्व औसतभन्दा २.५ गुणा बढी हो।
प्रकोप नियन्त्रणभन्दा बाहिर जान थालेको चेतावनी
खार्तुममा नियमित सेनाले नियन्त्रण लिएको भए पनि हाल पुनः दार्फुर क्षेत्रमा भिडन्त चर्किएको छ। अर्धसैनिक बलहरू एल–फाशर सहर कब्जा गर्न खोजिरहेका छन्, जसले स्थिति झनै जटिल बनाएको छ।
एमएसएफले चेतावनी दिँदै भनेको छ,’अहिले हैजा केवल शिविरहरूमा मात्र सीमित छैन, यो दार्फुरका विभिन्न स्थान हुँदै छिमेकी देशहरू–चाड र दक्षिण सुडानसम्म फैलिइरहेको छ।’
सुडानका लागि एमएसएफ प्रमुख तुना तुर्कमेनले भने,’यो केवल आपत्कालीन अवस्था होइन, महामारी नियन्त्रणभन्दा बाहिर गइसकेको छ। युद्धबाट बचेका नागरिकहरू रोकथाम गर्न सकिने रोगले मर्नु दुःखद हो।’
