बैतडी । बैतडीको पुर्चौडी नगरपालिकालाई पूर्णखोप सुनिश्चित तथा दिगोपना पालिका घोषणा गरिएको छ ।
नगरपालिका स्वास्थ्य शाखा प्रमुख विनोद कुवँरले ‘स्थानीय स्रोतको उपयोग, स्वामित्व र सहभागीता, पूर्ण खोप सुनिश्चित हाम्रो प्रतिबद्धता’ भन्ने नारासहित खोप नगरस्तरीय समन्वय समितिले पुर्चौडीलाई पूर्णखोप सुनिश्चिता तथा दिगोपना पालिका घोषणा गरिएको बताए ।
पाँच वर्षमुनिका सबै बालबालिकाले राष्ट्रिय खोप तालिका अनुसार सबै खोप एकिन भइसकेपछि नगरपालिकालाई पूर्णखोप सुनिश्चित तथा दिगोपना पालिका घोषणा गरिएको स्वास्थ्य शाखा प्रमुख कुवँरको भनाइ छ । यसअघि नगरपालिकाका १० वटै वडाहरुलाई पूर्णखोप सुनिश्चित तथा दिगोपना वडा घोषणा गरिएको उनले बताए ।
बालबालिकाहरुलाई विभिन्न १३ वटा रोगविरुद्ध खोप दिने गरिएको नगरपालिकाले जनाएको छ । यस्तै, नगरपालिकाले १० जना खोप कार्यकर्ता र १० जना महिला स्वास्थ्य स्वयसेविकाहरुलाई सम्मान गरिएको स्वास्थ्य शाखा प्रमुख कुवँरले बताए । पूर्ण खोप सुनिश्तिता तथा दिगोपना पालिका घोषणा गर्नमा महत्त्वपूर्ण भूमिका खेलेको भन्दै उनीहरुलाई सम्मान गरिएको कुवँरले बताए ।
नगरपालिकाले पूर्णखोप सुनिश्चित तथा दिगोपनाका लागि हरेक वर्ष राष्ट्रिय खोप तालिका अनुसार पाँच वर्षमुनिका बालबालिकाहरुले खोप पाए नपाएको एकिन गर्न घरधुरी सर्वेक्षण गर्दै आएको छ । कार्यक्रममा नगरप्रमुख दीपक बहादुर बम, प्रमुख प्रशासकीय अधिकृत जगदीश प्रसाद जोशी, १० वटै वडाका जनप्रतिनिधि, स्वास्थ्यकर्मी लगायतको उपस्थिति रहेको जनाएको छ ।
