बैतडी – कोइनोडा टिम गुरुखोला लायन्स बैतडीको पाटनमा जारी चौथो संस्करणको पाटन प्रिमियर लिगको सेमिफाइनलमा पुगेको छ।
आज सम्पन्न सुपर सिक्सको खेलमा निङ्लाशैनी क्रिकेट क्लब, देहिमाडौंलाई १३२ रनले हराएर गुरूखोला समूह विजेताको रूपमा सेमिफाइनलमा पुगेको हो।
गुरूखोलाले दिएको १९० रनको लक्ष्य पछ्याएको निङलाशैनी १०।४ ओभरमा ५७ रनमा अलआउट भयो ।
उसमा खडक बोहराले २६ र भुपेश बोहराले अविजित १० रन बनाउनुबाहेक अन्यले दोहोरो अंकमा रन जोड्न सकेनन् ।
गुरूखोलाका प्रदीप चन्दले ह्याट्रिकसहित ५ विकेट लिए । उनी म्यान अफ द म्याच समेत चुनिएका स्कोरर तिलक बोहराले बताए ।
प्रदीप यो संस्करणमा ह्याट्रिक गर्ने पहिलो बलर समेत बनेका छन्।
यसअघि श्रीकृष्ण मावि पाटनको खेलमैदानमा टस जितेर पहिला ब्याटिङ गरेको गुरूखोलाले २० ओभरमा ६ विकेटको क्षतिमा १८९ रन बनायो ।
जसमा प्रदीप चन्दले ४० र आयुश चन्दले ३९ रनको योगदान गरे । निङलाशैनीका राम चन्दले ३ विकेट लिए ।
यो लज्जास्पद हारसंगै उपाधि दाबेदार मानिएको निङलाशैनी सुपर सिक्सबाटै घर फर्किन बाध्य भएको छ । यस्तै आफ्नो समूहबाट गुरूखोला विजेता र पाटन भ्याली क्रिकेट क्लब उपविजेताको रूपमा अन्तिम चारमा सुरक्षित भएको हो । अर्को समूहबाट सेमिफाइनल पुग्ने टिमको टुंगो लाग्न बाँकी छ ।
पाटन क्रिकेट क्लबको आयोजनामा असोज ३० गतेदेखि शुरू भएको प्रतियोगिताको फाइनल खेल बुधबार हुनेछ।
प्रतियोगिताको प्रथम पुरस्कार १ लाख २३ हजार ४५६ नगदसहित ट्रफी, मेडल, र प्रमाणपत्र, द्वितिय पुरस्कार ५६ हजार ७८९ नगदसहित ट्रफी, मेडल, र प्रमाणपत्र प्रदान गरिने क्रिकेट क्लबले जनाएको छ ।
यसैगरी म्यान अफ द सिरज वाफत १२ हजार ३४५ नगदसहित ट्रफी, मेडल, र प्रमाणपत्र प्रदान गरिने छ । बेस्ट बलर र ब्याट्सम्यानलाई पनि समान ६ हजार ७८९ नगदसहित ट्रफी, मेडल, र प्रमाणपत्र प्रदान गरिने छ । कुशलखबरबाट
