काठमाडौँ : भारतीय प्रान्त छत्तीसगढको नारायणपुरमा भएको मुठभेडमा २६ माओवादी मारिएको दाबी प्रहरीले गरेको छ।
छत्तीसगढ राज्यका गृहमन्त्री विजय शर्माले बुधबार बताएअनुसार ओरछा क्षेत्रमा लगभग ५० घण्टादेखि खोजी अभियान चलिरहेको थियो। यसै क्रममा २६ भन्दा बढी माओवादी मारिएका हुन्।
उनले भनेका छन्, ‘केही ठूला माओवादी कार्यकर्ताहरू पनि मारिएको रिपोर्ट आएको छ।’
उनले मारिएका माओवादीहरूको संख्या बढ्न सक्ने बताएका छन्।
उनले खोजी अभियान जारी रहेको बताएका छन्।
१५ महिनादेखि छत्तीसगढमा प्रहरीले माओवादीविरुद्ध सघन कारबाही सञ्चालन गरेको छ। जसमा अहिलेसम्म ४०० भन्दा बढी माओवादी मारिएको दाबी प्रहरीले गरेको छ।
देशका गृहमन्त्री अमित शाहले २०२६ मार्च ३१ सम्ममा देशबाट माओवाद पूर्ण रूपमा उन्मूलन गर्ने घोषणा गरेका छन्।
