काठमाण्डौँ :प्रतिकूल मौसमका कारण हवाई सेवा प्रभावित भएको छ।
त्रिभुवन अन्ताराष्ट्रिय विमानस्थल कार्यालयका अनुसार भिजिबिलिटी कमजोर हुँदा कैयौँ हवाई उडान प्रभावित भएका छन्।
कार्यालयका प्रवक्ता रिन्जी शेर्पाका अनुसार दोहाबाट काठमाण्डौँका लागि आएका कतार एयरवेजका क्यूआर६५२ जहाज कोलकाता डाइभर्ट गरिएको छ। त्यसबाहेक मलेसियाबाट आएको नेपाल एयरलाइन्स र एयर चाइनाका विमान पनि डाइभर्ट भएका छन्। मौसमकै कारण सिचुआन एयरलाइन्सको उडान रद्द भएको छ।
मौसमका कारण आन्तरिक उडान पनि प्रभावित भएका छन्। कार्यालयका अनुसार काठमाण्डौँ–पोखरा, काठमाण्डौँ–भरतपुर, काठमाण्डौँ–नेपालगञ्ज, काठमाण्डौँ–राजविराज, काठमाण्डौँ, विराटनगर, काठमाण्डौँ–जनकपुर, काठमाण्डौँ–भद्रपुर, काठमाण्डौँ–भैरहवा लगायतका केही उडान रद्द भएको कार्यालयले जनाएको छ। साथै अधिकांश उडान डिले भएका छन्।
