काठमाडौं – इंग्लिस प्रिमियर लिगमा फुटबलमा आज ६ वटा खेल हुँदैछन् ।
आज हुने पहिलो खेलमा नेपाली समय अनुसार बेलुका सवा ५ बजे नवप्रवेशी इपस्विप टाउन र लिभरपुल खेल्दैछन् ।
त्यस्तै बेलुका पौने ८ बजे आर्सनल र उल्भ्स, एभर्टन र ब्राइटन, न्यूक्यासल र साउथह्याम्पटन, नटिङघम फरेस्ट र बर्नमाउथबीच खेल हुनेछ ।
त्यस्तै राति सवा १० बजे वेस्ट ह्याम र एस्टनभिल्ला खेल्दैछन् । प्रिमियर लिगमा म्यानचेस्टर युनाइटेडले विजयी सुरुवात गरेको छ । गएरातिदेखि शुरु भएको नयाँ सिजनमा युनाइटेडले घरेलु मैदान ओल्ड ट्राफोर्डमा फुलहमलाई १–० गोलले हरायो ।
हालै युनाइटेडमा आबद्ध भएका नेदरल्यान्ड्सका फरवार्ड जोशुआ जिर्कजीले खेलको ८७ औँ मिनेटमा गरेको गोल नै निर्णायक भयो ।
जितसँगै उसले तीन अङ्क जोडेको छ । अघिल्लो सिजन म्यानचेस्टर सिटीले उपाधि जितेको थियो । नयाँ सिजनको प्रिमियर लिग सन् २०२५ को मे २५ तारिखसम्म चल्नेछ ।
