धनगढी – साढे ६ अर्ब लगानीको भौतिक संरचना बनिसक्दासम्म कैलालीको गेटास्थित शहीद दशरथ चन्द स्वास्थ्य विज्ञान विश्वविद्यालय सञ्चालनमा नआएपछि यसबारे सुदूरपश्चिम प्रदेश सभामा कुरा उठेको छ।
आज बसेको प्रदेश सभा बैठकमा ढ्यापढ्यापे समय माग गरेर प्रदेश सभा सदस्यले एमबीबीएस पढाई हुने गरी विश्वविद्यालय सञ्चालनका लागि यथाशीघ्र काम अगाडि बढाउन संघ र प्रदेश सरकारको ध्यानाकर्षण गराएका छन्।
राज्यले एमबीबीएस अध्ययन कोटा निर्धारण गर्दा यस प्रदेशलाई नसमेट्नु विभेदकारी नीति रहेको उनीहरुको भनाइ छ।
प्रदेश सभा सदस्य धर्मराज पाठकले कैलालीको गेटामा शहीद दशरथ चन्द स्वास्थ्य विज्ञान विश्वविद्यालय सञ्चालनको काम र तीन सय शैय्याको अस्पताल यथाशीघ्र अगाडि बढाउनका लागि संघ र प्रदेश सरकारको ध्यानाकर्षण गराएका छन् ।
उनले शहीद दशरथ चन्द स्वास्थ्य विज्ञान विश्वविद्यालय सञ्चालन सम्बन्धी विधेयक प्रतिनिधि सभाको विषयगत समिति रहेको भन्दै सो विधेयक चाँडै पास गर्न आग्रह गरेका छन् ।
स्वास्थ्यको विभिन्न सूचकमा निकै पछाडि परेको सुदूरपश्चिममा एमबीबीएस पढाइको कोटा नदिएर राज्यले यस प्रदेशलाई विभेदकारी नीतिले हेरेको उनको भनाइ थियो।
विश्वविद्यालय बनाउनका लागि पाँच अर्ब बढी लगानीको भौतिक संरचना बनि सक्दा पनि राज्यले हेपेको भन्दै पाठकले प्रश्न गरे,“यो प्रदेशवासी छात्राछात्रले आफ्नै भूमिमा एमबीबीएस कहिले पढ्न पाउने ?”
सुदूरपश्चिममा सुलभ स्वास्थ्य संस्था नहुँदा यस प्रदेशवासीले स्वास्थ्योपचारको नाममा भारतको लखनउ, दिल्ली, बरेलीमा गएर धेरै पैसा खर्च गर्नु परिरहेको उनको भनाइ छ। उनले यो विषय प्रदेशको साझा विषय रहेकाले प्रदेश सभाबाट साझा संकल्प प्रस्ताव गर्न आग्रह गरे।
यसैगरी, प्रदेश सभा सदस्य जानकी पौडेलले शहीद दशरथ चन्द स्वास्थ्य विज्ञान विश्वविद्यालय सञ्चालनको काम अविलम्ब अगाडि बढाउन प्रदेश सरकारको धारणा मागसहित ध्यानाकर्षण गराएकी छन्।
