डडेलधुरा ।नेपाल विद्युत् प्राधिकरण वितरण केन्द्रको महसुल बुझ्ने अनलाइन (सेन्ट्रल सर्भर) सिस्टम बिग्रँदा महसुल बुझ्ने काम स्थगित गरिएको छ ।
करिब ९४ प्रतिशत विद्युतीकरण भएको यस जिल्लाका ग्राहकले नियमित शुल्क तिर्ने गरेका छन् ।
आइतबारदेखि महसुल बुझ्ने काम स्थगित गरिएको कार्यालय प्रमुख रमेश अवस्थीले बताए । उनका अनुसार डाउन भएको सर्भर बनाउन काठमाडौँ पठाइएको छ । महसुल बुझ्न अनलाइन सर्भरका लागि सिपियु उपकरण आवश्यक हुन्छ ।
आइतबारदेखि पुनः सेवा सञ्चालन हुने अपेक्षा गरिएको छ । सर्भर बिग्रँदाको समयमा महसुल बुझाउन हुने ढिलाइका कारण ग्राहकलाई जरिबाना नगरिने उनले बताए ।
डडेलधुरामा १६ हजार पाँच सय ग्राहक रहेका छन् । करिब आठ हजार ग्राहक भित्री मधेश क्षेत्र जोगबुडाको परशुराम नगरपालिका र आलीताल गाउँमा रहेका छन् ।
