धनगढी – सुदूरपश्चिम प्रदेशका मुख्यमन्त्री कमलबहादुर शाहले सरकारले छिट्टै बजेट ल्याउने तयारी गरिरहेको बताएका छन्।
सोमबार बिहान आफ्नो निवासमा पत्रकार सम्मेलन गर्दै उनले बजेट ल्याउने कानुनी प्रक्रियाबारे छलफल भइरहेको बताए ।
मुख्यमन्त्री शाहले सरकारले बजेट निर्माणका चारवटा आधार तय गरेर मन्त्रालय र मातहतका निकायलाई निर्देशन गरेको जानकारी दिए।
उनले २५ लाख रुपैयाँभन्दा साना योजना तथा कार्यक्रम बजेटमा नराख्ने आधार तय गरिएको बताए। २५ लाखभन्दा कम बजेट विनियोजन गर्नुपर्ने भएमा कार्ययोजनासहित ससर्त अनुदानको रूपमा स्थानीय तहलाई वित्तीय हस्तान्तर गरिने प्रस्ट पारे।
‘व्यक्ति, समूह, संस्था, निजी फर्म, कम्पनी र सहकारी आदिलाई तोकेर बजेट विनियोजन गर्दैनौँ,’ मुख्यमन्त्री शाहले भने, ‘प्रदेश सरकारबाट कार्यान्वयन हुने कुनै पनि योजना उपभोक्ता समितिमार्फत कार्यान्वयन गरिने छैन।’
सरकारका मन्त्रीहरू राखेर पत्रकार सम्मेलन गरेका मुख्यमन्त्री शाहले बजेट निर्माणका क्रममा यी चार आधारलाई लागू गर्न मन्त्रालय र मातहतका निकायलाई निर्देशन गरिएको बताए। अघिल्लो सरकारले १ असारमा सदनमा पेस गरेको बजेट पारित हुन नसकेपछि प्रदेश अहिले बजेटविहीनताको अवस्थामा छ। नयाँ सरकारले नयाँ बजेट ल्याउने तयारी गरिरहेको छ, तर कुन प्रक्रियाबाट बजेट ल्याउने भन्ने निर्णय सरकारले गरिसकेको छैन।
कानुनअनुसार असार मसान्तभित्र बजेट पारित गरिसक्नुपर्ने भए पनि बजेट पारित नभएको अवस्थामा बजेट ल्याउने संवैधानिक र कानुनी प्रक्रियाबारे छलफल भइरहेको मुख्यमन्त्री शाहले बताए। बजेट निर्माणका लागि तय गरिएका आधारले बजेटमा हुने चलखेल रोकिने उनको दाबी छ।
मुख्यमन्त्री शाहले सेवा प्रवाह प्रभावकारी बनाउन तथा सुशासन र पारदर्शिता कायम गर्न कर्मचारी प्रशासनलाई आफूले प्रस्ट निर्देशन दिएको बताए। गठबन्धनमा आबद्ध दलबीच न्यूनतम साझा धारणा कायम गर्न छलफल भइरहेको उनको भनाइ थियो।
