काठमाडौँ ।परराष्ट्रमन्त्री डा. आरजु राणा देउवाले अहिलेका मन्त्रीहरूलाई स्टन्ट गर्न जरुरी नरहेको बताएकी छन् ।
उनले बुधबार दिउँसो काठमाडौँको त्रिपुरेश्वरिस्थित राहदानी विभाग र कन्सुलर विभागको निरीक्षण एवं अवलोकनपछि सञ्चारकर्मीसँग कुरा गर्दै यस्तो बताएकी हुन् ।
अहिले सरकारमा दुई पुराना राजनीतिक दलहरू रहेको उल्लेख गर्दै आफूहरूले काम गरेर प्रमाणित गरिसकेकाले स्टन्ट देखाउनुपर्ने जरुरी नरहेको उनले बताइन् ।
उनले भनीन्, ‘‘सरकारमा रहेका दुई पार्टी धेरै नै पुराना पार्टीहरू छन्। हामीले काम गर्नसक्छौँ। हामीले देशको लागि केही गर्नसक्छौँ भनेर स्टन्ट गर्नुपर्ने जरुरी छैन। किनभने हामीले गरेर देखाइसकेका छौँ। हामी भन्दा अगाडिको पुस्ताले धेरै गाह्रो समयमा नेपाललाई अघि सारेको पार्टी हो। हामी युनिक छौँ, सबैभन्दा वेस्ट छौँ भनेर स्टन्ट गर्नुपर्ने जरुरी छैन। अहिले जुन सरकार बनेको छ, हेर्दा हामी सबै भर्खर नयाँ नयाँ छौँ। हुन तः म त्यति होइन, अरुअरु हुनुहुन्छ। इकोनोमिक डिप्लोमेसी, फरेन डाइरेक्ट इन्भेस्टमेन्ट यहाँ ल्याउने, पासपोर्टकै पनि नेपाली डेस्पोरा धेरै छ। अहिलेको सरकार स्टन्ट गर्न होइन, गम्भीर भएर काम गर्ने हो। हामीलाई भोलि जाला कि पर्सी जाला कि भन्ने चिन्ता छैन, निर्धक्कका साथ काम गर्नेछौँ। दुई पार्टी भएपनि एउटै लक्ष्य भएकाले हामीले परिवर्तन गरेर देखाउनेछौँ।’’
