धनगढी – कैलालीको धनगढीमा १३ औँ बृहत रक्तदान महोत्सव आयोजना गरिने भएको छ।
साउन २६ गते धनगढीमा बृहत रक्तदान महोत्सव आयोजना हुन लागेको हो। विगतका वर्षहरू झैँ बैतडी समाज कैलालीले “रक्तदान जीवनदान” भन्ने नाराका साथ रक्तदान कार्यक्रम सञ्चालन गर्न लागेको हो।
१३औँ बृहत् रक्तदान महोत्सवको आयोजना उत्तरबेहडी स्थित पदमा हेल्थ नर्सिङ कलेजको प्राङ्गणमा गर्ने तयारी गरेको रक्तदान कार्यक्रम संयोजक वीरबहादुर महराले बताए।
स्थापना कालदेखि बर्सेनि २ पटक रक्तदान कार्यक्रमको आयोजना गर्दै आएको समाजले यस अघि १२ पटक रक्तदान कार्यक्रम सम्पन्न गर्दा १ हजार ७५ जना स्वयंसेवी रक्तदाताहरूले रक्तदान गरेको बताए।
संयोजक महराले धनगढीमा रहनु हुने सम्पूर्ण स्वयंसेवी रक्तदाताहरूलाई रक्तदान कार्यक्रममा उपस्थित भई रक्तदान गरी कार्यक्रम सफल तुल्याउन अनुरोध गरेका छन्। यसैगरी, पहिलो पटक रक्तदान गर्ने रक्तदाताहरूलाई बैतडी समाज कैलालीले विभिन्न छुट र उपहारको व्यवस्था समेत गर्ने जनाएको छ।
विशेष गरी युवाहरूमा रक्तदानको महत्त्व र आवश्यकताको बारेमा सचेतनाको विकास गरेर रक्तदानलाई सामाजिकीकरण गर्दै लैजाने रक्तदान कार्यक्रमका सह–संयोजक राजबहादुर चन्दले बताए।
