काठमाण्डौं :प्रधानमन्त्री एवं नेकपा (एमाले)का अध्यक्ष केपी शर्मा ओलीले प्रतिगामी तत्वहरू सक्रिय हुँदा देशको राजनीति अन्योलपूर्ण र अस्तव्यस्त बनेको टिप्पणी गरेका छन्।
आइतबार नेकपा (एमाले) वागमती प्रदेश कमिटीद्वारा आयोजित वडाध्यक्षहरूको प्रशिक्षण कार्यक्रमलाई सम्बोधन गर्दै प्रधानमन्त्री ओलीले लोकतन्त्रवादी शक्तिहरू चुप लागेर बस्दा लोकतान्त्रिक प्रणालीविरुद्ध षड्यन्त्र भइरहेको टिप्पणी गरेका हुन्।
उनले पूर्वराजा ज्ञानेन्द्र शाहलाई लक्षित गर्दै जनताको अधिकारलाई तिलाञ्जली दिएर लाज नमानिकन जनतालाई रैति बनाउन लागिपरेको टिप्पणी गरे। केही रैतिहरू बिहान–बेलुकी नै पूर्वराजा शाहको वरपर घुमिरहेका समेत प्रधानमन्त्री ओलीको आरोप छ।
उनले नागरिक सर्वोच्चता चाहिँदैन भनेर दलालीमा समर्पित केही मान्छेहरूले नागरिकमा असन्तुष्टि बढाएको बताए। प्रतिगामी शक्तिहरूले व्यवस्था र संविधान विरोधी काम गर्न सामाजिक सञ्जालमा लगानी गरेको उनको आरोप छ।
सामाजिक सञ्जाल र डिजिटल प्लेटफहरूमा जनतामा असन्तुष्टि, समाजमा नकारात्मक सोच र भ्रम छर्ने उद्देश्यले योजनाबद्ध लगानी भइरहेको दाबी गरे।
निर्वाचित वडा अध्यक्षहरूलाई प्रधानमन्त्री ओलीले प्रतिगामी र व्यवस्था विरोधी गतिविधिबाट सचेत रहन र जनतामाझ सत्य कुराहरू राख्न सक्रिय भुमिका खेल्न आग्रह गरे।
