धनगढी । धनगढीको नोभा अस्पतालमा उपचाररत बिरामीको मृत्यु भएपछि अस्पताल परिसरमा तनाव उत्पन्न भएको छ ।
कञ्चनपुरको बेलौरी नगरपालिका–२ का १७ वर्षीय नसिब चौधरीको मृत्यु भएपछि अस्पताल परिसरमा तनाव सिर्जना भएको हो ।
चिकित्सकको लापरबाहीका कारण बिरामीको मृत्यु भएको आफन्तले आरोप लगाएका छन् । उनीहरूले आज अस्पतालमा ढुङ्गामुढा गरेपछि स्थिति नियन्त्रणमा लिन प्रहरीले तीन राउण्ड अश्रुग्यास प्रहार गरेको छ ।
साउन ७ गते चेकजाँचका लागि अस्पताल पुगेका चौधरीलाई जन्डिस देखिएको भन्दै अस्पतालले भर्ना गरेको थियो । शुक्रबार थप उपचारका लागि नेपालगञ्ज रिफर गरिएकोमा एम्बुलेन्समा राख्नेक्रममा नै बिरामीको ज्यान गएको जनाइएको छ ।
अस्पतालले समयमा अन्यत्र रिफर नगर्दा बिरामीको ज्यान गएको मृतकका मामा रामकृष्ण चौधरीले आरोप लगाए । उनले चिकित्सकको लापरबाहीका कारण ज्यान गएको आरोप लगाएका छने । अस्पताल प्रशासनले भने बिरामीको उपचारमा चिकित्सकले लापरबाही नभएको दाबी गरेको छ ।
मृतकका आफन्तले घटनाको निष्पक्ष छानबिन, क्षतिपूर्ति र दोषी चिकित्सकमाथि कारबाही हुनु पर्ने मागसहित आन्दोलन थालेका छन् । उनीहरूले शव नबुझ्ने अडान राखेका छन् । आन्दोलनरत आफन्त तोडफोडमा उत्रिएपछि स्थिति नियन्त्रणमा लिन प्रहरीले अश्रुग्यास प्रहार गरेको जिल्ला प्रहरी कार्यालयले जनाएको छ । सुरक्षाका लागि अस्पतालमा प्रहरी तैनाथ गरिएको छ ।
