काठमाण्डौं –एएफसी महिला एशियन कप २०२६ को छनोट चरणको ‘ड्र’ सार्वजनिक भएको छ ।
महिला एशियन कप छनोटमा नेपाल समूह ‘एफ’ मा परेको छ । यो समूहमा नेपालसँगै उज्बेकिस्तान, लाओस र श्रीलङ्का छन् । यसअघि नेपालले उज्बेकिस्तानसँग ३ वटा खेल खेलेकोमा सबै हारेको छ । यस्तै नेपालले श्रीलङ्कालाई ८ वटै खेलमा हराएको छ । यस्तै नेपालले लाओससँग पहिलो पटक खेल्नेछ । यो समूहको खेल आउँदो जुनमा उज्बेकिस्तानमा हुनेछ ।
महिला एशियन कप छनोटमा ३४ वटा टोलीलाई ८ वटा समूहमा विभाजन गरिएको छ । हरेक समूहका विजेताले आउँदो वर्षको मार्चमा अस्ट्रेलियामा हुने एशियन कप खेल्नेछन् ।
एशियन कपमा आयोजक अस्ट्रेलियासँगै चीन, दक्षिण कोरिया र जापान छनोट भइसकेका छन् । प्रतियोगितामा १२ वटा टोली सहभागी हुनेछ ।
