वीरगञ्ज । पर्साको वीरगञ्जस्थित नारायणी रंगशालाको मर्मत तथा पुनर्निर्माण कार्य औपचारिक रूपमा सुरु गरिएको छ ।
रंगशालाको जीर्ण संरचना हटाएर नयाँ निर्माण गर्ने प्रक्रिया आजदेखि सुरु भएको हो ।
पर्सा जिल्ला खेलकुद विकास समितिका अध्यक्ष दीपककुमार कानुका अनुसार पहिलो चरणमा पुराना र जीर्ण ८८ प्याराफिटहरू डोजर प्रयोग गरेर भत्काउने काम सुरु गरिएको छ । ती संरचना हटाइसकेपछि नयाँ प्याराफिट निर्माण गरिने योजना रहेको उनले बताए ।
सरकारले चालु आर्थिक वर्ष २०८२/८३ को बजेटमार्फत रंगशालाको पुनर्निर्माणका लागि ४ करोड रुपैयाँ विनियोजन गरेको थियो । उक्त बजेट निकासा भएपछि निर्माण कार्य अघि बढाइएको हो । अध्यक्ष कानुका अनुसार तत्कालीन कानुनमन्त्री अजय चौरसियाको पहलमा तत्कालीन युवा तथा खेलकुदमन्त्री तेजुलाल चौधरीले बजेटमा यो रकम व्यवस्था गरेका थिए ।
हाल उपलब्ध रकमबाट प्रारम्भिक चरणका काम मात्रै सम्पन्न गरिने बताइएको छ । रंगशालाको पूर्ण मर्मत र स्तरोन्नतिका लागि भने थप बजेट आवश्यक पर्ने अध्यक्ष कानुले जानकारी दिए ।
पहिलो चरणको निर्माण पूरा भएपछि नेपाल सरकार र युवा तथा खेलकुद मन्त्रालयसँग थप बजेट माग गर्ने तयारी गरिएको छ ।
त्यस्तै मधेश प्रदेश सरकारले पनि चालु आर्थिक वर्षको नीति तथा कार्यक्रममा नारायणी रंगशालालाई अन्तर्राष्ट्रिय स्तरको रंगशाला बनाउने लक्ष्य उल्लेख गरेको छ । त्यसैले प्रदेश सरकारबाट पनि थप आर्थिक सहयोगका लागि पहल गरिने योजना छ ।
करिब ३५ हजार दर्शक क्षमता रहेको नारायणी रंगशाला लामो समयदेखि मर्मत अभावका कारण जीर्ण अवस्थामा पुगेको थियो । विगतमा यहाँ राष्ट्रियस्तरका विभिन्न खेलकुद प्रतियोगिता आयोजना हुने गरे पनि पछिल्ला वर्षहरूमा संरचना कमजोर भएपछि ठूला प्रतियोगिता सञ्चालन हुन सकेका थिएनन् ।
खेलाडी र खेलप्रेमीहरूले झन्डै एक दशकदेखि रंगशालाको पुनर्निर्माणको माग गर्दै दबाबमूलक आन्दोलन गर्दै आएका थिए । संघीय र प्रदेश संसदमा पनि यो विषय पटक–पटक उठ्दै आएको थियो ।
नारायणी रंगशालाको इतिहास हेर्दा, २०३८ सालमा तत्कालीन अञ्चलाधीश लक्ष्यबहादुर गुरुङको पहलमा १७ बिघा १० कट्ठा जग्गा खरिद गरी यसको योजना अघि बढाइएको थियो । २०४२ सालमा निर्माण सम्पन्न भएको रंगशालाको उद्घाटन तत्कालीन राजा वीरेन्द्र शाहले गरेका थिए ।
