गिरिजा प्रसाद पनेरू
धनगढी, पुस १
प्रदेश स्तरीय गायन प्रतियोगिता एसईई आइडल-५ को उद्घाटन गरिएको छ।
सुदूरपश्चिम प्रदेश स्तरीय गायन प्रतियोगिता एसईई आइडल-५ को आज शुक्रबार उद्घाटन गरिएको हो।
प्रभात मिडिया एण्ड इभेन्ट प्रालिद्वारा आयोजित उक्त प्रतियोगिता असार २ गतेसम्म चल्नेछ।
सुदूरपश्चिम प्रज्ञा प्रतिष्ठानका उपकुलपति डाक्टर टीएन जोशीको प्रमुख आतिथ्यता रहेको आज भएको उद्घाटन समारोहमा प्रभात मिडिया एण्ड इभेन्ट प्रालिका सञ्चालक प्रकाश छेडालको अध्यक्षता रहेको थियोे।
यसैगरी प्याब्सन धनगढीका नगर अध्यक्ष धुर्वबहादुर सिंह र सनराईज टेलिभिजनका सञ्चालक उत्तम थापाको विशिष्ट आतिथ्यता रहेको थियो।
उद्घाटन समारोहमा बोल्दै सुदूरपश्चिम प्रज्ञा प्रतिष्ठानका उपकुलपति डाक्टर टीएन जोशीले विगतदेखी एसईई आइडललाई सहयोग गर्दै आइरहेको र यसको ५ औं सिजनमा पनि प्रज्ञा प्रतिष्ठानका तर्फबाट सहयोग रहने बताएका छन्।
“हाम्रा विद्यार्थी भाइबहिनीहरुमा थुप्रै सम्भावना छ। उनीहरुले त्यसलाई प्रस्फुटन गर्ने मञ्च पाइरहेका छैनन्।” डा. जोशीले भने, यसबाट तपाईंको कलालाई बाहिर ल्याउने एउटा प्ल्याटफर्मको रूपमा यसलाई लिएका छौँ। यसमा ९ वटै जिल्लाका विद्यार्थीको सहभागिता होस भन्ने मेरो शुभकामना छ।”
यस्तै विद्यार्थीमा भएको प्रतिभालाई उजागर गर्नका लागि एसईई आइडलको आयोजना गरिएको आयोजक संस्थाका अध्यक्ष प्रकाश छेडालले बताएका छन्।
“एसईई आइडल एउटा कुनै संस्थाको मात्रै नभई समग्र सुदूरपश्चिमको आफ्नो कार्यक्रम हो।” अध्यक्ष छेडालले भने, ” यो कार्यक्रमको एसईई एक्जामभन्दा अगाडी अडिसन गर्नेछौं।”
अडिसनमा सहभागीले गाएका गीतहरूलाई फेसबकमा राखिने र २० दिनसम्म भिडियोले पाएको भ्युजका आधारमा र जजले प्रदान गरेका अंकका आधारमा उत्कृष्ट ३० जना विद्यार्थीहरु सेमिफाइनलमा प्रवेश हुन पाउने उनले बताए।
सेमिफाइनल २०८३ बैशाख १५ गते हुनेछ भने, त्यसबाट उत्कृष्ट १५ जना छनोट भइ असार २ गते फाइनल हुनेछ।
फाइनलबाट एकजना विजेता र एकजना उपविजेता चयन गरिनेछ। विजेतालाई ७५ हजार नगदसहित कक्षा ११ र १२ मा पूर्ण छात्रवृत्ति प्रदान गरिनेछ भने, उपविजेतालाई नगद ३० हजारसहित कक्षा ११ र १२ मा पूर्ण छात्रवृत्ति प्रदान गरिनेछ।
