एजेन्सी : अमेरिकी विदेशमन्त्री मार्क रुबियोले युक्रेनसँगको शान्ति वार्तामा अमेरिकी राष्ट्रपति डोनाल्ड ट्रम्प र रुसी राष्ट्रपति भ्लादिमिर पुटिन अनिवार्य उपस्थित हुनुपर्ने बताएका छन् ।
टर्किएमा भएको नाटोका विदेश मन्त्रीको बैठक सकिएपछि उनले रुस–युक्रेन युद्ध रोक्न अमेरिकी राष्ट्रपति ट्रम्प र रुसी राष्ट्रपति पुटिनले पहल गर्नुपर्ने बताएका हुन् ।
टर्किएमा हुने शान्ती वार्तामा सहभागी हुन पुटिनले आफू नगई रुसको प्रतिनिधिमण्डल मात्र पठाएको सन्दर्भमा अमेरिकी विदेशमन्त्री रुबियोले शान्ति वार्ता निष्कर्षमा पुग्नेमा शङ्का व्यक्त गर्नुभएको बीबीसीले जनाएको छ ।
पुटिनले आफ्ना सहयोगी भ्लादिमिर मेडेन्सकीको नेतृत्वमा प्रतिनिधि मण्डल पठाएको भन्दै युक्रेनी राष्ट्रपति भोलोदोमिर जेलेन्स्कीले पनि उनको आलोचना गरेका छन् ।
यस्तै खाडी देशको भ्रमणमा भएका अमेरिकी राष्ट्रपति ट्रम्पले पनि वार्ताले ठोस निकास पाउन र युद्ध अन्त्य गराउन आफू र पुटिनकै वार्ता आवश्यक रहेको बताउँदै आएका छन् ।
यस अघि युरोपेली नेता र युक्रेनले ३० दिने युद्ध विरामको कुरा उठाएपछि पुटिन आफैले हिजोका लागि द्विपक्षीय वार्ताको प्रस्ताव राखेका थिए।
