धनगढी – सुदूरपश्चिम प्रदेश सरकारको मन्त्रीपरिषद्को बैठकले सीमापार आवागमन, पर्यटन, व्यापार सहजीकरण तथा लागुऔषध नियन्त्रणका लागि दुई समिति गठन गर्ने निर्णय गरेको छ।
मुख्यमन्त्री तथा मन्त्रिपरिषद्को कार्यालयमा शुक्रबार बसेको बैठकले ‘लागुऔषधजन्य गतिविधि नियन्त्रण सुपरिवेक्षण समिति’ गठन गर्ने निर्णय गरेको हो।
उक्त समितिको संयोजक मुख्यमन्त्री तथा मन्त्रिपरिषद्को कार्यालयका प्रमुख सचिव रहनेछन् भने सदस्यमा प्रदेश सचिव (आन्तरिक मामिला तथा कानून मन्त्रालय), कैलाली र कञ्चनपुरका प्रमुख जिल्ला अधिकारी, नेपाल प्रहरी, सशस्त्र प्रहरी र राष्ट्रिय अनुसन्धान विभागका प्रदेश प्रमुख रहनेछन्। सदस्य सचिव प्रदेश सचिव (कानून) रहनेछन्।
त्यस्तै, ‘सीमापार आवागमन, पर्यटन तथा व्यापार सहजीकरण समिति’ पनि प्रमुख सचिव (मुख्यमन्त्री तथा मन्त्रिपरिषद्को कार्यालय) को संयोजकत्वमा गठन गरिएको छ। यस समितिमा आर्थिक मामिला तथा भौतिक पूर्वाधार विकास मन्त्रालयका सचिव, कैलाली र कञ्चनपुरका प्रमुख जिल्ला अधिकारी, सुरक्षा निकायका प्रदेशस्तरीय प्रमुखहरू सदस्य रहनेछन्। समितिको सदस्य सचिव आन्तरिक मामिला तथा कानून मन्त्रालयका प्रदेश सचिव रहनेछन्।
बैठकले सीमापार आवागमन, रोजगारीका लागि भारत जाने नेपाली नागरिकको अभिलेख व्यवस्थापन, भन्सार चेकजाँच तथा राजस्व अभिवृद्धि जस्ता विषयलाई व्यवस्थित र प्रभावकारी बनाउन कार्यविवरण र कार्ययोजना तयार गरी अघि बढ्ने निर्णय पनि गरेको छ।
