काठमाण्डौं –सुदूरपश्चिम प्रदेशका उद्योग, पर्यटन, वन तथा वातावरणमन्त्री लक्ष्मणकिशोर चौधरीले पदबाट राजीनामा दिएका छन् ।
आर्थिक लेनदेनको आरोप लागेपछि उनले राजीनामा दिएको हो ।
कांग्रेस, एमाले र नागरिक उन्मुक्ति पार्टीको संयुक्त सरकारमा चौधरी नागरिक उन्मुक्ति पार्टीबाट मन्त्री बनेका हुन् । उनले मन्त्रालयमा पत्रकार सम्मेलन गर्दै आर्थिक लेनदेनको आरोप लागिसकेपछि नैतिकताका आधारमा राजीनामा दिएको बताएका छन् ।
मुख्यमन्त्री कमलबहादुर शाहले मन्त्री चौधरीलाई पदबाट राजीनामा दिन निर्देशन दिएका थिए। दीगो वन व्यवस्थापन कार्यविधि मन्त्रिपरिषदबाट पारित तथा कार्यान्वयन गर्नका लागि व्यापारीहरुसँग मन्त्री चौधरीले आर्थिक लेनदेनको सन्दर्भमा कुराकानी गरेको अडियो केही दिनअघि सार्वजनिक भएको थियो ।
अडियोमा उनले नागरिक उन्मुक्ति पार्टीका केन्द्रीय नेता, मुख्यमन्त्री लगायतलाई मिलाउन रकम चाहिने बताएका थिए । उनले पार्टीभित्रको आन्तरिक गुटबन्दीको पनि सिकार हुन पुगेको दाबी गरेका छन् ।
