धनगढी –धनगढीको साइपाल शिक्षा सदनले कक्षा १० का विद्यार्थीहरूको विदाइ तथा शुभकामना कार्यक्रममा पुस्तक आदानप्रदान गरिएको छ ।
पठन संस्कृतिलाई प्रवर्द्धन गर्ने उद्देश्यले विद्यालयले यस वर्षको विदाइ कार्यक्रममा पुस्तक आदानप्रदानलाई मुख्य प्राथमिकता दिएको हो।
समारोहमा कक्षा ९ र कक्षा १० का विद्यार्थीहरूले एकअर्कासँग पुस्तक आदानप्रदान गरेका थिए। कक्षा ९ का विद्यार्थीहरूले ‘बुढीपोल्ली’, ‘सम्बन्धको दोबाटो’, ‘नाजवाफ’, ‘कथा हुन्, कथा होइनन्’ र ‘ऐलानी’ जस्ता पुस्तक वितरण गरेका थिए भने कक्षा १० का विद्यार्थीहरूले ‘मुना’ पत्रिका प्रदान गरेका थिए।
विद्यालयका शिक्षक नवराज जोशीका अनुसार पछिल्लो समय प्रविधिको दुरुपयोगले समाज विकृत दिशामा लागिरहेको सन्दर्भमा अध्ययन संस्कृतिलाई पुनः जागृत गराउने उद्देश्यले पुस्तक आदानप्रदानको परम्परा सुरु गरिएको हो।
उनले मासु-चिउरा खाएर मात्र विदाइ कार्यक्रम मनाउने परिपाटीलाई तोड्दै पुस्तक वितरणमार्फत नयाँ रित स्थापित गर्न विद्यालय सफल भएको बताए। समारोहमा विद्यार्थीहरूलाई अध्ययन संस्कृतिप्रति थप प्रेरित गर्न विभिन्न सल्लाह तथा सुझाव प्रदान गरिएको थियो।
साथै कक्षा १० का विद्यार्थीलाई मायाको चिनोसमेत प्रदान गरिएको छ।
