एजेन्सी:इजरायली प्रधानमन्त्री बेन्जामिन नेतान्याहुको कार्यालयले ‘बन्धकहरूलाई रिहा गर्ने सम्झौता’ मा सहमति भएको जनाएको छ ।
हमासले अन्तिम समयमा सम्झौतामा परिवर्तनहरू गर्न खोजेको आरोप लगाउँदै इजरायली प्रधानमन्त्री नेतान्याहुले हिजो मन्त्रिपरिषद्बाट गाजा युद्धविराम सम्झौतालाई अनुमोदन गर्ने प्रक्रियामा ढिलाइ गर्नुभएको थियो । नेतान्याहुको कार्यालयद्वारा वार्ताका लागि गठित टोलीले आज बिहान प्रधानमन्त्रीलाई युद्धविराम सम्झौतामा सहमति भएको जानकारी दिएको खबरमा उल्लेख छ ।
नेतान्याहुको कार्यालयले मन्त्रिपरिषद् बैठक बोलाउन आदेश पनि दिएको बताएको छ । यसपछि सम्झौता स्वीकृत हुनेछ । यसबारे बन्धकका परिवारलाई जानकारी गराइएको छ ।
इजरायली मिडिया रिपोर्ट्का अनुसार इजरायल, हमास, अमेरिका र कतारका प्रतिनिधिले दोहामा सम्झौतामा हस्ताक्षर गरेका छन् । अस्ति बुधवार अमेरिका र कतारले युद्धविराम सम्झौताको बारेमा पहिलो जानकारी दिएका थिए ।
महिनौंदेखिको वार्ता तथा छलफलपछि इजरायली वार्ताकारहरू युद्धविरामको सम्झौतामा सहमत भएका हुन् । पर्सि आइतवारदेखि युद्धविराम सम्झौता पूर्णरूपमा लागू हुने बताइएको छ ।
यसैबीच हमास सञ्चालित स्वास्थ्य मन्त्रालयका अनुसार अस्ति युद्धविराम सम्झौता घोषणा भएयता गाजामा इजरायलले गरेको आक्रमणमा परेर ८० जनाभन्दा धेरैको ज्यान गएको छ ।
सन् २०२३ को अक्टोबर ७ मा हमासको आक्रमणमा १ हजार २०० जना मारिएपछि इजरायलले गाजामा जवाफी आक्रमण शुरू गरेको थियो । त्यस क्रममा हमासले २ सय ५१ जनालाई बन्धक बनाएको थियो । त्यही समूहमा नेपालका विपिन जोशी पनि रहेका ठानिएको छ तर उनको अवस्थाबारे अहिलेसम्म थाहा भएको छैन ।
इजरायलको आक्रमणमा परेर गाजामा ४६ हजार ७ सय जनाभन्दा धेरैको ज्यान गइसकेको हमासद्वारा सञ्चालित स्वास्थ्य मन्त्रालयले जनाएको छ ।
