काठमाण्डौँ :ऊर्जा व्यवसायीहरूको संस्था ग्रिन इनर्जी अन्टरप्रेनर्स नेपालले १० मेगावाटभन्दा साना जलविद्युत् आयोजनाको अनुमतिपत्रमा भएको ३५ वर्षे बन्देज हटाउन सरकारसँग माग गरेको छ।
बुधवार काठमाण्डौँमा पत्रकार सम्मेलन आयोजना गर्दै संस्थाले ३५ वर्षे बन्देज हटाउँदै प्रशारण लाइन र ग्रिड कनेक्शन सम्झौतामा भएका असमानता र प्राविधिक पक्षको पुनरावलोकन गर्न सरकारसँग मा गरको हो। ग्रिन इनर्जी अन्टरप्रेनर्स नेपालका संयोजक सूर्यप्रसाद अधिकारीले निजी क्षेत्रबाट निर्माण भई सञ्चालनमा रहेका ५१० मेगावाट बराबरका ११० वटा जलविद्युत् आयोजनामध्ये अधिकांश जलविद्युत् आयोजना घाटामा चलिरहेको बताए।
उनले जलविद्युत् घाटामा जाँदा ऋण प्रवाह गर्ने बैंकहरुले केही आयोजनालाई लिलाम गर्ने प्रक्रियामा लगेको र केहीलाई नाजुक वित्तीय अवस्थामा र केहीलाई कमजोर वित्तीय अवस्थामा राखेको उल्लेख गरे।
उनका अनुसार अन्टरप्रेनर्सले पीपीएमा भएका असमानता हटाउन र विद्युत् खरिददर बढाउन, उत्पादन अनुमतिको अवधि ५० वर्ष कायम गर्न, पूर्ववत् रूपमा विदेशबाट खरिद गर्नुपर्ने हरेक उपकरण, स्पेयर्स पार्टस् र सेवाहरूमा अधिकतम १ प्रतिशत कर लागू गर्न र वैकल्पिक व्यवस्थामार्फत विद्युत् उत्पादन गरिरहेका आयोजनाको असमान करारनामा तत्काल हटाउनुपर्नेसहित ६ बुँदे माग राखेका हुन्।
उनले साना जलविद्युत् आयोजनालाई दिगो रूपमा सञ्चालन गर्ने सवालमा बहस प्रारम्भ गर्न जरुरी रहेको बताए।
