काभ्रेपलाञ्चोक –काभ्रेपलाञ्चोकको रोशीमा गएको असोज दोस्रो हप्ताको बाढी पहिरोबाट प्रभावित एक हजार दुई सय ३० पीडित परिवारलाई संयुक्त राष्ट्रसङ्घीय विश्व खाद्य कार्यक्रम (डब्ल्यूएफपी) ले राहत रकम प्रदान गरेको छ ।
डब्ल्यूएफपीको नेपालमा रहेको कार्यालयमार्फत राहत रकम प्रभावित परिवारलाई प्राप्त भएको रोशी गाउँपालिका कार्यालयले जनाएको छ । बाढी पहिरोमा परी गाउँपालिकामा १२ जनाको ज्यान गएको थियो । चार सय ८२ घर पूर्णरूपमा तथा आठ सय ८३ घर आंशिकरूपमा क्षति पुगेको थियो ।
डब्ल्यूएफपीले पीडित परिवार सङ्ख्याका आधारमा राहतस्वरूप सरकारको बाढी पहिरो पीडितलाई परिवार सङ्ख्याका आधारमा दिने नीतिअनुसार १५ हजार तथा २० हजार रुपैयाँका दरले नगद नै सम्बन्धित लाभग्राहीको बैंक खातामा पठाएको गाउँपालिकाका अध्यक्ष दिनेश लामाले जानकारी दिए ।
उनले सबै पीडितको बैंक खातामा रकम जम्मा भइसकेको र कुनै समस्या आए गाउँपालिकामा तत्काल सम्पर्क गर्न आग्रह गरेका छन् ।
