काठमाण्डौं –काठमाण्डौंमा आज यस वर्षकै चिसो महसूस गरिएको छ ।
जल तथा मौसम विज्ञान विभाग, मौसम पूर्वानुमान महाशाखाका अनुसार आज काठमाण्डौंको न्यूनतम तापक्रम २ डिग्री सेल्सियसमा झरेको छ ।
यसअघि हिजो काठमाण्डौंको न्यूनतम तापक्रम ३ दशमलव १ डिग्री थियो । महाशाखाले आज बिहान ८ बजेर ४५ मिनेटमा सार्वजनिक गरेको तापक्रम विवरणअनुसार सबैभन्दा कम जुम्लाको न्यूनतम तापक्रम माइनस ७ दशमलव २ डिग्रीमा झरेको छ ।
तराईमा हुस्सु र कुहिरो
अहिले देशमा पश्चिमी वायुको सामान्य प्रभाव रहेको छ । अहिले देशभर मौसम सामान्यतया सफा रहेको महाशाखाले जनाएको छ । तराईका केही ठाउँमा हुस्सुरकुहिरो लागिरहेको छ ।
आज दिउँसो कोशी प्रदेशका पहाडी भू–भागमा आंशिक बदली रही बाँकी भू–भागमा मौसम मुख्यतया सफा रहने महाशाखाले जनाएको छ । यस्तै राति देशभर मौसम मुख्यतया सफा रहने छ ।
