काठमाण्डौं –सर्वोच्च अदालतका पूर्वन्यायाधीश प्रकाश वस्तीको निधन भएको छ ।
७१ वर्षीय वस्तीलाई हृदयघात भएपछि गएराति उपचारका लागि काठमाण्डौंको थापाथलीमा रहेको नर्भिक अस्पतालमा पुर्याइएको थियो । अस्पतालका अनुसार उनको राति नै निधन भएको हो ।
वस्ती २०६५ साल भदौ २२ गते सर्वोच्च अदालतको न्यायाधीश नियुक्त भएका थिए । पछि पदावधि नथपिएपछि उनी २०७० साल चैत २९ गते अस्थायी न्यायाधीशका रूपमै सर्वोच्च अदालतबाट अवकाश भएका थिए । सर्वोच्च अदालतबाट अवकाश भएपछि वस्तीले ६ वर्ष राष्ट्रिय मानव अधिकार आयोगको सदस्य भएर काम गरे ।
२०१० साल असार ८ मा जन्मिएका प्रकाश वस्ती २०३३ सालदेखि कानून व्यवसायमा प्रवेश गरेका हुन् । उहनले अख्तियार दुरुपयोग अनुसन्धान आयोगमा पनि कानूनी सल्लाहकार बनेर काम गरेका हुन् । पछिल्लो समय उनी न्याय र कानूनको क्षेत्रमा अध्ययन, अनुसन्धान एवम् पुस्तक लेखनमा सक्रिय थिए । ‘हाम्रो कानूनी इतिहासको नालीबेली’ वस्तीले लेखेको एउटा महत्त्वपूर्ण पुस्तक मानिन्छ ।
वस्तीका छोरा अमेरिकामा भएका कारण छोरा आएपछि अन्तिम संस्कार गर्ने परिवारको तयारी छ ।
