कञ्चनपुर —सुदूरपश्चिम प्रदेशमा दसैं र तिहारको जुवातास खेल्ने ३ सय ९७ जनालाई प्रहरीले पक्राउ गरेको छ ।
असोज १ देखि कात्तिक २० गतेसम्म प्रदेशका ६ जिल्लाबाट २९ लाखभन्दा बढी नगदसहित उनीहरुलाई पक्राउ गरिएको हो ।
प्रदेश प्रहरी कार्यालयका अनुसार दसैं र तिहारका अवधिमा चाडबाड सुरक्षा योजना लागू भएपश्चात् सबैभन्दा बढी कैलालीमा १ सय ८४ जना पक्राउ परेका छन् ।
उनीहरुबाट ११ लाख ९ हजार रकम बरामद भएको छ । कञ्चनपुरबाट १ सय ५९ जना पक्राउ र ११ लाख ९० हजार बरामद भएको छ ।
यसैगरी, डडेलधुरामा २८ जना र ४ लाख ४१ हजार, डोटीमा १२ जना र १२ हजार, अछाममा ९ जनाबाट ८६ हजार तथा बझाङमा ५ जनालाई ६६ हजार नगदसहित पक्राउ गरिएको प्रदेश प्रहरी कार्यालयले जनाएको छ ।
