काठमाडौं –सहयोगीलै नै पूर्वभूमिसुधार राज्यमन्त्री रामचन्द्र राय यादवको हत्या गरेको प्रहरी अनुसन्धानबाट खुलेको छ ।
जिल्ला प्रहरी कार्यालय सर्लाहीले सोमबार पत्रकार सम्मेलन गरी रायका सहयोगीसमेत रहेका कविलासी नगरपालिका–३, का रामउजैन राय र चन्द्रनगर गाउँपालिका–१, रतनपुरका ४६ वर्षीय वीरेन्द्र रायलाई सार्वजनिक गरेको हो ।
प्रहरीले रामलाई मुख्य अभियुक्त र वीरेन्द्रलाई घटनाका योजनाकार भनेको छ । सर्लाही प्रमुख प्रहरी प्रमुख एसपी रवीन्द्रबहादुर सिंहका अनुसार रामउजैनले रायको हत्या गरेको स्वीकार गरेका छन् ।
हत्याका योजनाकार वीरेन्द्र भने पूर्वराज्यमन्त्री रायका सँधियार हुन् । जग्गा मिचिएको भन्दै वीरेन्द्रको योजनामा रायका सहयोगी रामउजैनले हत्या गरेको निष्कर्षमा प्रहरी पुगेको हो । रामको बयानका आधारमा प्रहरीले घटनामा प्रयोग गरेको हतियार ७ साउनमा बरामद गरेको थियो ।
सुरुमा संलग्नता अस्वीकार गरेका रामले वीरेन्द्रको निर्देशनमा जग्गा विवाद लिएर तीनजना अपरिचित आएको बताएको प्रहरीको दाबी छ । प्रहरीले रामले लगाएको गन्जी, हाफ्पेन्टसमेत घटनास्थलबाट बरामद गरेको थियो ।
‘वीरेन्द्रले लामो समयदेखि रायले आफ्नो खेत मिचेको स्थानीयसँग दावी गर्दै आएको खुल्यो,’ प्रहरी उपरीक्षक सिंहले भने, ‘जग्गाको पुरानो नक्सा खोजेको, पुरानो नक्सा मृतकको घरमा रहेको पत्ता लगाएको पाइयो । रामलाई प्रयोग गरेर निकालेर भिडियो खिचेकोसमेत हामीले फेला पारेका छौँ ।’ रामलाई घर बनाइदिने, खेती गर्न सोही जग्गा दिने र नगद दुई लाख दिने सर्तमा हत्या गर्न लगाएकोसमेत अनुसन्धानबाट खुलेको छ ।
