चितवन – पहिरोले बगाएर त्रिशूलीमा बेपत्ता भएका बस र यात्रुको शव खोजीका लागि आएको भारतीय उद्धार टोली विनाउपलब्धि फर्किएको छ।
सात दिनका लागि नेपाल सरकारको अनुरोधमा चितवन आएको भारतको राष्ट्रिय आपदा मोचन बल (एनडिआरएफ)का गोताखोरसहितको १२ जनाको प्राविधिक टोली आइतबार फर्किएको हो।
भारतीय टोलीले ठोस उपलब्धि हासिल नगरे पनि घटनास्थलनजिक विभिन्न दुई ठाउँलाई सम्भावित ठाउँका रूपमा पहिचान गरेर आफूहरूलाई जानकारी दिएको चितवनका प्रमुख जिल्ला अधिकारी इन्द्रदेव यादवले बताए। ‘भारतीय टोलीले भनेका ठाउँसहित अन्य ठाउँमा पनि नेपाली सुरक्षाकर्मीले खोजी कार्यलाई निरन्तरता दिनेछन्,’ उनले भने, ‘भारतीय टोलीले तीन दिनभित्र खोजीकार्यको विषयमा प्रतिवेदन नेपाललाई बुझाउनेछ।’
बससँगै बेपत्ता भएकाहरूको खोजीकार्यका क्रममा भारतीय टोलीको १९ केजीको चुम्बक र लाइफब्वाई ट्युबसमेत हराएको थियो। नदीको बहाव र वेगका कारण खोजीकार्यमा समस्या हुँदै आएको छ। सोही कारण भारतीयले लिएर आएको तीनवटा आधुनिक सोनार क्यामेरासमेत पूर्ण रूपमा प्रयोग हुन पाएन।
काठमाडौंबाट रौतहटको गौरका लागि छुटेको गणपति डिलक्स र वीरगन्जबाट काठमाडौंका लागि छुटेको एन्जल डिलक्स बस गत २८ असारमा भरतपुर महानगर– २९, सिमलतालस्थित नारायणगढ–मुग्लिन सडकमा पहिरोसँगै त्रिशूली नदीमा खसेका थिए । बसमा सवार ६५ मध्ये तीनजना पौडिएर बाँचे पनि ६२ जना बेपत्ता भएका थिए। अहिलेसम्म २४ जनाको शव फेला परेको छ। ३८ जनाको अवस्था अझै अज्ञात छ।
भेटिएको शवमध्ये तीन महिलासहित १९ जनाको मात्र सनाखत भएको छ । ४ साउनदेखि कुनै पनि शव भेटिएका छैनन्। यसअघि भेटिएका शव पनि बगाएर लगेको अवस्थामा नारायणी नदी र भारतीय सीमाका छेउछाउमा भेटिएको थियो। सो कारण पनि बसको अवशेष फेला पर्ने सम्भावना तत्काल नदेखिएको प्रजिअ यादव बताउँछन्। उनले भने, ‘घटना भएको १६ दिन भइसकेको छ। शव फेला परे पनि पहिचान हुन सक्ने अवस्था छैन। बसको अवशेष पनि फेला पर्ने तत्काललाई सम्भावना देखिएको छैन।’ मन्त्रिपरषद्को निर्णयअनुसार मृतकसरह बेपत्तालाई पनि राहत दिने प्रक्रियालाई आफूले सहजीकरण गर्ने यादव बताउँछन्।
सिमलताल पहिरोमा परी त्रिशूली नदीमा बेपत्ता र बसको खोजीका लागि सुरुदेखि नै सशस्त्र प्रहरी, नेपाली सेना, नेपाल प्रहरी, गोताखोरका साथै आधुनिक किसिमको वाटरड्रोन (सोनार), आकाशबाट पनि ड्रोन क्यामेरा, र्याफ्टिङ बोट, मोटरबोट, ठूलो चुम्बक र फलामको हुक (एंकर)को प्रयोग गरिएको छ। किनारको वारिपारि मोटरबोट र दूरबिनको प्रयोगमार्फत पनि खोजी भइरहेको छ।
