धनगढी –धनगढीमा ट्रकको सामान अनलोड गर्ने क्रममा शव फेला परेको छ ।
वीरगञ्जबाट समान ल्याएको सुपप्र ०१००१ ख २४४२ नम्बरको ट्रक अनलोड गर्ने क्रममा शव फेला परेको प्रहरीले जनाएको छ ।
कैलालीका प्रमुख प्रहरी उपरीक्षक (एसपी) पदमबहादुर बिष्टका अनुसार शव फेला परेपछि ट्रक चालक कञ्चनपुरको बेदकोट नगरपालिका–९ का ३८ वर्षीय लबिन्द्र राना र सहचालक २२ वर्षीय ओमप्रकाश रानालाई नियन्त्रणमा लिइएको छ ।
ट्रकमा वीरगञ्जबाट छड र प्लाष्टिकका बोरा ल्याइएको थियो । चालक र सहचालकले ट्रकमा भेटिएको शवबारे कुनै जानकारी नभएको र सामान अनलोड गर्ने क्रममा मात्र देखेको बयान प्रहरीलाई दिएका छन् ।
पहिचान खुल्न नसकेको शव सेती प्रादेशिक अस्पतालमा राखिएको छ । घटनाबारे थप अनुसन्धान जारी रहेको प्रहरीले जनाएको छ ।
