कैलाली – कैलालीमा चैते धान लगाएका किसानले यो वर्ष बाढीका कारण धान भित्र्याउन पाएनन् ।
गएको असार १९ गते पथरैया नदीमा आएको बाढीले दुई हप्तासम्म धान डुबानमा परेपछि सबै नष्ट भएको किसानले बताएका छन् ।
एक बिघा क्षेत्रफलमा चैते धान लगाएका भजनी नगरपालिका–८ का ओम पाण्डेले उत्पादन राम्रो हुने, बर्खामा खेती नहुने भएपछि सबै क्षेत्रमा चैते धान लगाएको तर डुबानले सखाप बनाएको बताए ।
भजनीकै लालप्रसाद न्यौपानेले पनि चैते धान भित्र्याउन पाएनन् । असार १९ गतेको डुबानले १६ कट्ठामा लगाएको सबै धान नष्ट भएपछि रोपाइँ गर्दा भएको खर्चको जोहो समेत गर्न मुस्किल भएको उनको भनाइ छ ।
यस वर्ष ढिलो गरी धान रोप्नु र छिटो बाढी आउनुले पनि धेरै किसानको धान डुबानले नष्ट हुन पुग्यो ।
