दिपायल । डोटीमा घाँस काट्न गएकी महिला मृत अवस्थामा फेला परेकी छन् । जिल्लाको दिपायल सिलढी नगरपालिका –७, पाकरीकन ४८ वर्षीया चन्द्रा विष्ट मृत अवस्थामा गाउँ नजिकको जङ्गलमा फेला परेकी हुन् ।
स्थानीय हिक्मतबहादुर विष्टका अनुसार उनी शनिबार बिहान ११ बजेतिर घाँस काट्न भनेर घरबाट निस्किएकी थिइन् । साँझ ७ बजेसम्म घर नफर्किएपछि आफन्तले खोजी गरेका थिए ।
खोजी कार्यका लागि प्रहरीलाई राति ९ बजे खबर गरिएको थियो । आइतबार बिहान उनको शव घरभन्दा आधा घण्टाको दूरीमा रहेको जङ्गलमा भेटिएको जिल्ला प्रहरी कार्यालय डोटीका प्रवक्ता प्रहरी नायब उपरीक्षक भीमलाल भट्टराईले बताएका छन् ।
शव जङ्गलमा घोप्टो परेको अवस्थामा फेला परेको प्रहरीको भनाइ छ । घटनाबारे थप अनुसन्धान भइरहेको भट्टराईले बताए ।
