धनगढी :धनगढी क्रिकेट एकेडेमी (डीसिए) को अन्डर–१६ टोलीले आज भारतको मुम्बईमा आफ्नो पहिलो मैत्रीपूर्ण खेल खेल्दैछ।
टोलीले मुम्बईको फिनिक्स स्पोर्ट्स क्लबविरुद्ध आज मैदान उत्रिन लागेको हो।
क्रिकेट प्रशिक्षण तथा अन्तर्राष्ट्रिय अनुभव दिलाउने उद्देश्यले डीसीएको टोली केही दिनअघि मुम्बई पुगेको हो। भ्रमणका क्रममा टोलीले मुम्बईका विभिन्न ६ वटा स्थानीय क्लबहरूसँग मैत्रीपूर्ण खेल खेल्ने तालिका रहेको छ।
त्यसैगरी टोलीले मुम्बईस्थित वाङ्खडे स्टेडियममा नेपालसहित विभिन्न देशहरूबीच हुने विश्वकप क्रिकेटका खेलहरू प्रत्यक्ष अवलोकन गर्ने कार्यक्रम पनि रहेको डीसीएका म्यानेजर सन्दीप भट्टले जानकारी दिएका छन्।
यस भ्रमणले युवा खेलाडीहरूलाई अन्तर्राष्ट्रिय वातावरणमा खेल्ने अनुभव, सीप विकास र आत्मविश्वास बढाउन महत्वपूर्ण सहयोग पुग्ने विश्वास गरिएको छ।
