बैतडी।बैतडीसहित सुदूरपश्चिमका पहाडी जिल्लामा लामो समयदेखि वर्षा नहुँदा गहुँबाली सुक्न थालेका छन् ।
पुस अन्तिम साता लागिसक्दा पनि हिउँदे वर्षा नहुँदा गहुँसहित हिउँदे तरकारी र फलफूलमा समेत प्रतिकूल असर पर्न थालेको हो ।
खडेरीका कारण खेतमा लगाइएको गहुँबाली सुक्दै गइरहेको सूर्नया गाउँपालिका–३ का किसान लक्ष्मी ऐरीले बताउइन्। यसैगरी, पाटन नगरपालिका–३ का किसान अम्बादत्त भट्टले गहुँबाली सुकेपछि अर्को वर्ष लगाउका लागि बिउसमेत नहुने चिन्ता बढेको बताए।
सिँचाइ सुविधा नभएका क्षेत्रमा खडेरीको असर बढी देखिएको किसानहरूको भनाइ छ । सिँचाइ अभावका कारण अधिकांश गहुँबाली सुकिसकेको र यस वर्ष उत्पादनमा निकै कमी आउने अवस्था देखिएको मेलौली नगरपालिका–२ सलेनाका किसान देवदत्त भट्टले बताए ।
यसैगरी, लामो समयसम्म खडेरी रहिरह्यो भने गहुँबाली केही सुकेको त केही बादरले नष्ट गर्दै जाँदा भोकमरी हुन सक्ने पाटन नगरपालिका–३ का किसान दिपकबहादुर चन्दले बताए । विशेषगरी पहाड र हिमालका उच्च लेकाली र हिमाली क्षेत्रमा सिँचाइ सुविधा नहुँदा गहुँबाली हुर्कन नसकेको किसानहरूको भनाइ छ ।
जिल्लामा करिब १५ हजार चार सय हेक्टर क्षेत्रफलमा गहुँखेती हुँदै आएको भए पनि आधाभन्दा बढी क्षेत्रमा सिँचाइ सुविधा नभएको कृषि ज्ञान केन्द्र बैतडीका प्रमुख हरिदत्त जोशीले बताए । खडेरीका कारण सिँचाइ नभएका स्थानमा उत्पादनमा ह्रास आउने र खाद्यान्न आयातमा निर्भरता बढ्ने देखिएको उनले बताए ।
