काठमाण्डौं :तलब र सेवा सुविधालाई लिएर अस्पतालमा कार्यरत नर्सहरू आन्दोलित भएपछि पोखरा स्थित मणिपाल मेडिकल कलेजले नर्सहरूको तलब बढाउने निर्णय गरेको छ।
नर्सहरूको आन्दोलनपछि मणिपाललेतलब सुविधा बढाउने निर्णय गरेको हो । अस्पताल प्रशासनले सार्वजनिक गरेको नर्सहरूको नयाँ तलब स्केलमा
एक वर्ष अनुभव भएको बीएस्सी र बीएन स्टाफ नर्सको मासिक तलब २९ हजार ५८७ रुपैयाँ तोकिएको छ।
पीसीएल स्टाफ नर्स एक वर्ष अनुभवीलाई २८ हजार ५८७ रुपैयाँ र सीएमए अनमीहरू जो एक वर्ष अनुभवी छन्। उनीहरूको २६ हजार ५८७ रुपैयाँ तोक्ने निर्णय भएको छ । कलेजले फ्रेस स्टाफ नर्सको तलब २४ हजार २८७ रुपैयाँ तोकिएको समेत बताएको छ।
मणिपाल मेडिकल कलेज सञ्चालक शान्तराज बतासले नयाँ प्रस्तावमा अधिकांश नर्सहरूले समर्थन जनाएको बताएका छन तर नर्सहरूले आन्दोलन भने स्थगित गरेका छैनन्।
मणिपाल प्रशासनका अनुसार हाल त्यहाँ ३ सय हाराहारीमा नर्सहरू कार्यरत छन्। कास्कीको पोखरामा रहेको मणिपाल मेडिकल कलेज उपत्यका बाहिरको विशेषज्ञ सेवाको लागि सबैभन्दा धेरै बिरामीको चाप हुने शिक्षण स्वास्थ्य संस्था मध्य एक हो।
केहीदिन देखी नर्सहरू सेवा छाडेर आन्दोलनमा उत्रिएपछि अहिले अस्पतालमा भर्ना गरिएका कतिपय बिरामीहरूलाई अन्यत्र रिफर गरिएको छ भनेआईसीयू जस्ता संवेदनशील युनिटमा नर्सिङ इन्चार्जहरूले काम गरिरहेका छन्।
