धनगढी :प्रमुख प्रतिपक्षी दलको नेताको हैसियतले नेकपा माओवादी केन्द्रका अध्यक्ष पुष्पकमल दाहाल’ ‘प्रचण्ड’ले आज प्रतिनिधिसभाको बैठकमा सम्बोधन गर्दै छन् ।
सामन्यतयाः प्रधानमन्त्री र प्रमुख प्रतिपक्षी दलको नेतालाई संसदको प्रमुख दुई व्यक्तिको रूपमा लिइन्छ । जसका कारण यीमध्ये एक व्यक्तिले सम्बोधन गर्दा अर्को व्यक्ति उपस्थित हुनुलाई अनिवार्य जस्तै मानिन्छ ।
तर, प्रधानमन्त्री केपी शर्मा ओलीले भने यो मान्यता भत्काएका छन् । अघिल्लो पटक प्रचण्डले संबोधन गर्दा पनि ओली प्रतिनिधिसभामा उपस्थित थिएनन् । र, आज प्रचण्डले सम्बोधन गर्दा पनि उनी अनुपस्थित हुने भएका छन् ।
आज दिउँसो १ बजे प्रतिनिधिसभाको बैठक बस्दै छ । जसमा प्रचण्डले सम्बोधन गर्नेछन् । प्रधानमन्त्रीको सचिवालयले उपलब्ध गराएको कार्यतालिकाअनुसार भने ओली त्यो समयमा नेपाल प्रज्ञा प्रतिष्ठानमा त्रिवि शिक्षण अस्पतालको ४३औँ वार्षिकोत्सव समारोहमा सहभागी हुनेछन् ।
