काठमाण्डौँ :६० किलो सुन तस्करी प्रकरणमा शुक्रबार पक्राउ परेकी अमला रोकाको आज पनि थुनछेक बहस जारी छ ।
जिल्ला अदालत काठमाडौँका न्यायाधीश बलराम लम्सालको इजलासमा थुनछेक बहस हुँदैछ ।
आइतबारदेखि रोकाविरुद्ध थुनछेक बहस सुरु भएकोमा बहस नसकिएपछि हेर्दाहेर्दैमा राखिएको थियो । आज बहस सकिएमा रोकालाई थुनामा पठाउने कि पुर्पक्षका लागि थुना बाहिर राख्ने भन्ने टुङ्गो लाग्नेछ ।
उनलाई प्रहरीले शुक्रबार टोखाबाट पक्राउ गरेको थियो । नेकपा माओवादी केन्द्रनिकट मानिने रोका उक्त तस्करीमा पक्राउ परी थुनामा रहेका बेल्जियम नागरिक दावा छिरिङकी श्रीमती हुन् ।
राजस्व अनुसन्धान विभागले २ साउन २०८० मा त्रिभुवन अन्तर्राष्ट्रिय विमानस्थलबाट भन्सार राजश्व जाँच पास गरेर बाहिरिएको ६० किलो सुन बरामद गरेको थियो । उक्त मुद्दामा जिल्ला सरकारी वकिलको कार्यालयले २९ जनाविरुद्ध मुद्दा दायर गरेकोमा त्यसयता रोका फरार रहँदै आएकी थिइन् ।
