धनगढी – धनगढीमा जारी राष्ट्रिय युवा संघ कप भलिबल प्रतियोगिता-२०८१ अन्तर्गत आज भएको तेस्रो दिनको खेलमा मालिकार्जुन, रानाथारु आदर्श युवा क्लब, डोटी र शाह पोल्ट्री फर्मले जीत हात पारेका छन् ।
राष्ट्रिय युवा संघ नेपाल, सुदूरपश्चिम प्रदेश कमिटीको आयोजनामा चैत २९ गतेबाट धनगढी रंगशालामा सुरु भएको खुल्ला पुरुष भलिबल प्रतियोगितामा डोटी र मालिकार्जुन बीच भएको पहिलो खेलमा मालिकार्जुनले जित हात पारेको छ भने रानाथारु आदर्श युवा क्लब र शाह पोल्ट्री फर्म बीच भएको दोस्रो खेलमा रानाथारु आदर्श युवा क्लबले जित हात पारेको छ ।
यसैगरी डोटी र अछाम बीच भएको तेस्रो खेलमा डोटीले जित हात पारेको छ भने ऐश्वर्य बहुमुखी क्याम्पस र शाह पोल्ट्री फर्म बीच भएको चौथो खेलमा शाह पोल्ट्री फर्मले जित हात पारेको छ ।
राष्ट्रिय युवा संघ नेपाल, सुदूरपश्चिम प्रदेश कमिटीको आयोजनामा चैत २९ गतेबाट धनगढी रंगशालामा सुरु भएको खुल्ला पुरुष भलिबल प्रतियोगिता बैशाख २ गतेसम्म चल्ने आयोजकले जनाएको छ ।
प्रतियोगितामा प्रथम हुने टोलीले नगद २ लाख २५ हजार रुपैयाँ, दोस्रो हुनेले १ लाख २५ हजार तथा तेस्रो हुने टोलीले ७५ हजार रुपैयाँ पुरस्कार प्राप्त गर्नेछ।
लागुऔषध दुर्व्यसनविरुद्ध जनचेतना अभिवृद्धि गर्दै युवा वर्गलाई खेलकुदमार्फत सकारात्मक दिशातर्फ उन्मुख गराउने उद्देश्यले प्रतियोगिता आयोजना गरिएको राष्ट्रिय युवा संघ नेपाल, सुदूरपश्चिम प्रदेश कमिटीको भनाई छ।
