धनगढी —लागूऔषधको बढ्दो प्रयोग र यसको दुष्परिणामप्रति युवाहरूलाई सचेत गराउने उद्देश्यले राष्ट्रिय युवा संघ नेपाल, सुदूरपश्चिम प्रदेश कमिटीले धनगढीमा भलिबल प्रतियोगिता आयोजना गर्न लागेको छ।
चैत २९ गतेदेखि वैशाख २ गतेसम्म धनगढी रङ्गशालामा सञ्चालन हुने खुला पुरुष भलिबल प्रतियोगितामा पहिलो हुने टोलीलाई २ लाख २५ हजार, दोस्रो हुनेलाई १ लाख २५ हजार र तेस्रो हुने टोलीलाई ७५ हजार रुपैयाँ पुरस्कार प्रदान गरिने संघले जनाएको छ।
यसअघि प्रतियोगिता चैत १९ गतेबाट सुरु हुने भनिएपनि स्वतन्त्र विद्यार्थी युनियन (स्ववियु) को निर्वाचन परेकाले कार्यक्रमलाई केही दिनपछि सारिएको हो। निर्वाचन सकिएपछि अब भने युवा संघले पूर्ण तयारीसहित प्रतियोगिता सञ्चालन गर्न लागेको छ।
राष्ट्रिय युवा संघ, नेपालले पछिल्लो समय युवालाई लागुऔषध, हिंसा, बेरोजगारी र निराशाबाट जोगाउँदै सकारात्मक ऊर्जा र रचनात्मकताको दिशामा उन्मुख गराउने उद्देश्यले विभिन्न कार्यक्रमहरू सञ्चालन गर्दै आएको छ। यसै क्रममा खेलकुद गतिविधिलाई प्राथमिकतामा राख्दै संघले भलिबल प्रतियोगिताको आयोजना गरेको हो।
संघका अनुसार भलिबल प्रतियोगिता केवल खेल मात्र नभई सामाजिक सन्देश बोकेको कार्यक्रम पनि हो। ‘आजको युवा खेलकुदमा सक्रिय रहँदा भोलिको समाज स्वस्थ, सबल र समृद्ध हुन्छ,’ राष्ट्रिय युवा संघका सुदूरपश्चिम प्रदेश अध्यक्ष अरुण कुँवरले भने, ‘हामी लागूऔषधविरुद्धको अभियानलाई खेलकुदसँग जोड्दै चेतना फैलाउन चाहन्छौं।’
धनगढी लगायत सुदूरपश्चिममा पछिल्ला वर्षहरूमा युवाबीच लागूऔषधको प्रयोग बढ्दो छ। यसले पारिवारिक, शैक्षिक, सामाजिक र मानसिक क्षेत्रमा गम्भीर असर पारिरहेको छ। यस्तो अवस्थामा खेलकुदमार्फत युवाहरूलाई अनुशासित, स्वस्थ र आशावादी बनाउने संघको प्रयास सराहनीय देखिन्छ।
राष्ट्रिय युवा संघ, नेपालले भविष्यमा पनि यस्ता रचनात्मक तथा जनचेतनामूलक कार्यक्रमलाई निरन्तरता दिने प्रतिबद्धता जनाएको छ। संघले खेलकुदलाई मात्र नभई साहित्य, कला, नेतृत्व विकास, वातावरण संरक्षण जस्ता थुप्रै क्षेत्रमा युवाहरूको सहभागिता सुनिश्चित गर्ने कार्यमा सक्रियता बढाएको छ।
धनगढी रङ्गशालामा हुने यो प्रतियोगिताले खेलप्रेमी युवालाई ऊर्जा प्रदान गर्नुका साथै लागूऔषधको विरुद्ध दृढ सन्देश दिने विश्वास लिइएको छ। संघले सम्पूर्ण सुदूरपश्चिमवासीलाई प्रतियोगिता अवलोकन र समर्थन गर्न समेत आग्रह गरेको छ।
